नुवाकोट ककनीका एक पुरुषमा कोरोना संक्रमण, संक्रमितको संख्या ६ सय नाघ्यो

Best Khabar Team | २०७७ जेठ ११ गते आइतबार

२४ मे, २०२०
काठमाडौं । ३ नम्बर प्रदेश अर्थात् बाग्मती प्रदेशको नुवाकोट जिल्लामा पहिलो पटक कोरोना संक्रमित भेटिएका छन् । स्वास्थ्य मन्त्रालयले दिएको जानकारी अनुसार नुवाकोटका एक पुरुषमा कोरोना संक्रमण भेटिएको हो । उनको हाल चिकित्सकको निगरानीमा उपचार भै रहेको मन्त्रालयको भनाई छ ।

नुवाकोटमा कोरोना संक्रमित देखिएको यो पहिलो घटना हो । ककनीका ३९ वर्षका पुरुषमा कोरोना संक्रमण देखिएको मन्त्रालयको भनाई छ । मन्त्रालयका अनुसार नुवाकोटमा एकसहित आज देशका विभिन्न जिल्लामा गरी थप १९ जनामा कोरोना संक्रमण देखिएको छ । नयाँ थपिएकामा मोरङ्ग, बारा, रौतहट, सर्लाही, र काठमाडौंमा एक एक जना रहेका छन् ।

यस्तै रुपन्देही, पर्सा र कपिलबस्तुमा गरी थप ९ जनामा संक्रमण भेटिएको छ । यस्तै गुल्मीमा पनि थप एकजनामा कोराना संक्रमण देखिएको छ । यो सँगै देशका ४२ जिल्लामा कोरोना संक्रमण फैलिएको छ । देशका ६ सय ३ जनामा हालसम्म कोरोना संक्रमण देखिएको छ । हालसम्म ८९ जनाले कोरोनालाई परास्त गर्दै घर फर्केका छन् भने ३ जनाको उपचारको क्रममा निधन भएको छ ।