भारतमा थप ३ साता ‘लकडाउन’ लम्बियो, मृतकको संख्या साढे ३ सय नाघ्यो

Best Khabar Team | २०७७ बैशाख २ गते मंगलबार

१४ अप्रिल, २०२०
नयाँदिल्ली । विश्वभर महामारीको रुपमा फैलिएको कोरोना भाइरस (कोभिड १९) को संक्रमणबाट बच्न नेपालको छिमेकी मुलुक भारतले लकडाउनको समयावधि थप गरेको छ । यसअघि आजसम्मका लागि लकडाउनको समयावधि रहेकोमा आज भारतीय सरकारले आगामी बैशाख २१ अर्थात् मे ३ तारिखसम्मका लागि लकडाउनको समयावधि थप भएको जनाएको छ ।

भारतमा पछिल्ला दिनहरुमा कोरोना संक्रमितको संख्या बढ्न थालेपछि त्यहाँको सरकारले लकडाउनलाई थप कडाई गर्दै लगेको छ । यही क्रममा उसले आज थप ३ साताको लागि लकडाउन लम्ब्याउने घोषणा समेत गरेको हो । भारतीय प्रधानमन्त्री नरेन्द्र मोदीले आम नागरिकको सुरक्षा र कोरोना निरुत्साहनको लागि लकडाउन नै एकमात्रै भरपर्दो विकल्प भएको बताएका छन् । भारतमा हालसम्म कोरोनाका कारण १० हजार बढी संक्रमित भएका छन् भने ३ सय ५८ जनाको ज्यान गै सकेको छ ।

भारतीय सरकारले आम नागरिकका लागि आवश्यक पर्ने खाद्यान्न र औषधी पर्याप्त मात्रामा रहेको भन्दै सरकारको निर्देशन पालन गरेर घरभित्रै बस्न र सुरक्षा संयमता अपनाउन नागरिकहरुलाई आग्रह गरेको छ । भारतमा नाकाबन्दीको समय बढेसँगै नेपालमा पनि नेपाल सरकारले नाकाबन्दी थप्ने तयारी गरेको छ ।

यसका लागि नेपालमा आज दिउँसो मन्त्रीपरिषद्को बैठक बसेर निर्णय लिने नेपालका सञ्चारमाध्यमहरुले जनाएका छन् । भारतीय सरकारले लकडाउनका बेला बढी प्रभावित हुने बृद्दबृद्दा र मजदुरको हितमा छिट्टै विशेष कार्यक्रम सञ्चालन गर्ने जनाएको छ ।