सरकारले भन्यो : कुलमान घिसिङ्लाई प्राधिकरणको कार्यकारी निर्देशकमा निरन्तरता दिने विषयमा कुनै निर्णय भएको छैन

Best Khabar Team | २०२६ पुष १७ गते बिहिबार

२७ अगस्ट, २०२०
काठमाडौं । सरकारले नेपाल विद्यूत् प्राधिकरणको कार्यकारी निर्देशकमा कुलमान घिसिङ्लाई नै निरन्तरता दिने विषयमा कुनै औपचारिक निर्णय नभएको स्पष्ट पारेको छ । नेपाल सरकार मन्त्रीपरिषद्को आज बसेको बैठकले गरेको निर्णय सार्वजनिक गर्दै सञ्चारमन्त्री युवराज खतिवडाले घिसिङ्को निरन्तरताको विषयमा सामाजिक सञ्जालमा आएका विषयहरुमा कुनै सत्यता नभएको भन्दै यो विषयमा सरकार अनभिज्ञ रहेको बताए ।

**फाइल तस्वीर : सञ्चारमन्त्री युवराज खतिवडा ।**

पत्रकार सम्मेलनमा सञ्चारकर्मीले सोधेको प्रश्नको जवाफ दिँदै मन्त्री खतिवडाले यो विषयमा मन्त्रीपरिषद्मा कुनै प्रस्ताव नआएको र कुनै निर्णय नभएको स्पष्ट पारे । उनले भने ‘‘औपचारिक प्रस्ताव पनि आएको छैन, छलफल पनि भएको छैन । सामाजिक सञ्जालमा आएको लेखाई, बोलाई र सूचनामा कुनै सत्यता छैन । ” आगामी भदौ २८ गतेदेखि चारवर्षे कार्यकाल समाप्त हुन लागेका घिसिङ्गलाई पुनः चार वर्षकै लागि प्राधिकरणको कार्यकारी निर्देशनमा निरन्तरता दिन लागिएको भन्ने विषयले सामाजिक सञ्जाल तातेपछि सरकारले यस्तो स्पष्टीकरण दिएको हो ।

नेपालमा लोडसेडिङ्ग अन्त्यका लागि घिसिङ्गले उत्कृष्ट काम गरेको भन्दै सामाजिक सञ्जालमा घिसिङ्गलाई अबको थप एक कार्यकाल पनि प्राधिकरणकै कार्यकारी निर्देशकको रुपमा काममा निरन्तरता दिनुपर्नेमा बहुमत जुटेपछि सरकारको यो भनाई सार्वजनिक भएको हो ।