अक्टोबरपछि युरोपमा कोरोना संक्रमित बढ्नसक्ने डब्लुएचओको चेतावनी

Best Khabar Team | २०७७ भाद्र १२ गते शुक्रबार

२८ अगस्ट, २०२०
ब्रसेल्स, बेल्जियम । युरोपेली मुलुकमा गर्मी (समर) महिनाका दिनहरु छोटिँदै जाँदा कोरोना भाइरसका संक्रमण थप बढ्नसक्ने अनुमान गरिएको छ । गर्मी सकिएर जाडो यामको शुरुवातलगत्तै एकपटक युरोपमा फेरि कोरोना भाइरसको प्रकोप बढ्नसक्ने विश्व स्वास्थ्य संगठनको युरोप क्षेत्रीय निर्देशकले बताएका छन् ।

डब्लुएचओ युरोप क्षेत्रका निर्देशक डा. हान्सक्लग

हालै डेनमार्कको कोपनहेगनमा डब्लुएचओका युरोप क्षेत्रका निर्देशक डा. हान्सक्लगले विज्ञहरुको भनाई र प्राप्त तथ्यहरुलाई आधार मानेर गरिएको अनुसन्धानबाट जाडो मौसममा कोरोनाको संक्रमण थप बढ्ने पुष्टि भएको बताएका हुन् । उनले युरोपमा विन्टर शुरुभएसँगै कोरोना संक्रमितको संख्या बढ्नसक्ने भन्दै सतर्क र सावधानी अपनाउन सबैलाई आग्रह गरेका छन् । विशेष गरी युरोपमा अहिले समर चलिरहेका कारण कोरोना संक्रमितको संख्या केही कम भएपनि अक्टोबरपछि युरोपमा विस्तारै चिसोयाम शुरुहुने र त्यतिबेला कोरोना संक्रमण तीब्र बन्नसक्ने उनको अनुमान छ ।

अहिले धेरैजसो बृद्दबृद्धाहरु कोरोनाको चपेटामा परेको भएपनि चिसो मौसममा भने युवायुवतीहरुलाई समेत यो संक्रमणले समात्नसक्ने अड्कालबाजीहरु गरिएको छ । यस्तै बालबालिकामा पनि चिसो मौसममा सिजनल फ्लुको जोमिमा सँधै रहने भएको र त्यसमाथि पनि कोरोनाको जोखिम बढी हुने भन्दै विशेष सावधानी अपनाउन आग्रह गरिएको छ । उनले आफ्नो भविष्यबाणी डर र त्रास फैलाउन नभै चेतावनी र सजगताको लागि भएको स्पष्ट पारेका छन् । न्यून आर्द्रतामा कोरोना भाइरस फैलिने दर उच्च हुने विभिन्न अध्ययनहरुले पुष्टि गरेको सन्दर्भमा जाडो महिनामा कोरोना संक्रमितको संख्या ह्वात्तै बढ्नसक्ने अनुमान विज्ञहरुले गरेका छन् ।

विश्वका अधिकांश देशहरुमा कोरोना संक्रमण शुरुभएको ५/६ महिना वितिसक्दा समेत नयाँ संक्रमितहरु भेटिइरहेका कारण तत्काल यो रोग नियन्त्रणमा आयो भन्न सक्ने अवस्था रहेको चिकित्सकहरु बनाउँछन् । केही टापु देशहरुले आफ्नो देशलाई कोरोनमुक्त भनेर घोषणा गरेपनि इटली, स्पेनलगायतका देशहरुमा अहिले पनि दैनिक सयौंको संख्यामा नयाँ संक्रमितहरु भेटिइरहेका छन् । विश्वमा सबैभन्दा पहिला कोरोना संक्रमित भेटिएको चीनमा पछिल्लो २४ घण्टामा ९ जना कोरोना संक्रमित भेटिएका छन् । स्मरणीय के छ भने चीनमा गएको डिसेम्बरमा पहिलो पटक कोरोना संक्रमित भेटिएका थिए । चीनमा नयाँ संक्रमितको संख्या घटेको भएपनि देखिन छाडेको छैन ।