बेलायतमा कोरोनाबाट अर्का एक नेपालीको निधन, ज्यान गुमाउनेको संख्या ३ पुग्यो

Best Khabar Team | २०७६ चैत्र २६ गते बुधबार

०८ अप्रिल, २०२०
लण्डन । कोरोना (कोभिड १९) को संक्रमणमा परी बेलायतमा थप एकजना नेपालीको ज्यान गएको छ । नेपालको पर्वत जिल्ला घर भै लण्डनमा बस्दै आएका पूर्व गोर्खा सैनिक समेत रहेका चेतप्रसाद गुरुङ्गको हिजोसाँझ यहाँस्थित अस्पतालमा निधन भएको हो ।

उनी तमु धीं बेलायत अन्र्तगत लण्डन इकाइएका बरिष्ठ उपाध्यक्ष समेत रहेका थिए । विगत २ सातादेखि अस्पतालमा उपचाररत ५९ वर्षका गुरुङ्गको हिजो साँझ निधन भएपनि आज मात्रै अस्पतालले त्यसको जानकारी परिवारका सदस्यलाई गराएको थियो । हाल उनी लण्डनस्थित अल्पर्टनको एउटा अपार्टमेन्टमा श्रीमतीका साथ बस्दै आएका थिए । बेलायतमा कोरोनाका कारण ज्यान गुमाउने उनी तेश्रो नेपाली हुन् ।

यसअघि पूर्व गोर्खा सैनिक लीलाबहादुर राई तथा प्रशान्त अर्यालको कोरोना संक्रमणकै कारण ज्यान गएको थियो । यो समाचार तयार पर्दासम्म बेलायतमा कोरोनाका कारण हालसम्म ज्यान गुमाउनेको संख्या ७ हजार ९७ पुगेको छ ।

Comment from facebook