वीरगञ्जमा थप ३ जनामा कोरोना संक्रमण, संक्रमितको संख्या १२ पुग्यो

Best Khabar Team | २०७६ चैत्र ३० गते आइतबार

१२ अप्रिल, २०२०
काठमाडौं । नेपालमा थप ३ जनामा कोरोना संक्रमण देखिएको छ । योसँगै नेपालमा कोरोना संक्रमितको संख्या १२ पुगेको छ । पर्साको बीरगञ्जमा विगत ७ दिनदेखि उपचारत ३ जना भारतीय नागरिकमा कोरोना संक्रमण देखिएको स्वास्थ्य मन्त्रालयले जनाएको छ ।

संक्रमित मध्ये एकजना भारतीय मुस्लिम धर्मका गुरु रहेको रहेको भएपनि उनको नाम खुलाइएको छैन । हेटौडौस्थित किटजन्य रोग अनुसन्धान तालिम केन्द्रमा शुक्रबार ३५ जनाको कोरोना परीक्षण गरिएको थियो । ती मध्ये तीन जनामा कोरोना संक्रमणको आशंका देखिएपछि थप निर्क्यौलका लागि नमुना काठमाडौंमा रहेको राष्ट्रिय जनस्वास्थ्य प्रयोगशालामा पठाइएको थियो ।

काठमाडौंस्थित टेकु प्रयोगशालाले शनिबार राति अबेर उनीहरुमा कोरोना संक्रमण देखिएको पुष्टि गरेको हो । कोरोना देखिएकाहरु केहीदिन अघि पर्साको छप्कैयास्थित मस्जिदमा लुकेर वसेको अवस्था नियन्त्रणमा लिएर अस्पतालको आइसोलेसन वार्डमा राखेर उपचार थालिएको थियो । अहिले उनीहरुको अवस्था सामान्य रहेको छ ।

उनीहरुको सम्पर्कमा रहेकाहरुको खोजी गरी उनीहरुलाई पनि क्वारेन्टाईनमा राख्ने तयारी भै रहेको मन्त्रालयले जनाएको छ ।