सातै प्रदेशका जिल्ला अस्पतालबाट कोरोनाविरुद्धको खोप लगाईने

Best Khabar Team | २०७७ माघ १२ गते सोमबार

२५ जनवरी, २०२१
काठमाडौं । आगामी बुधबार बिहानबाट आम नागरिकमा लगाउने तयारीमा रहेको कोरोना भाइरस विरुद्धको भ्याक्सिन सरकारले देशका सातवटै प्रदेशमा रहेका अस्पतालहरुबाट लगाउन शुरु गर्ने जनाएको छ । स्वास्थ्य मन्त्रालयले दिएको जानकारी अनुसार आगामी बुधबारबाट देशका ७ वटै प्रदेशमा रहेका विभिन्न अस्पतालमा कार्यरत कर्मचारी, अस्पतालको सरसफाईमा खटिएका कर्मचारी, कोरोनाले ज्यान गुमाएकाको शव व्यवस्थामा खटिएका सेना, प्रहरीलगायत स्वयंसेवकलाई पहिलो चरणमा कोरोनाविरुद्धको भ्याक्सिन लगाउने सरकारले जनाएको छ ।

मन्त्रालयले दिएको जानकारी अनुसार सात प्रदेशका ५ दर्जन बढी अस्पतालबाट एकैपटक कोरोना भाइरसविरुद्धको भ्याक्सिनलगायत शुरु गरिने छ । देशका सबै जिल्ला अस्पतालबाट कोरोना विरुद्धको भ्यासिक्न लगाउने तयारी छ । जिल्ला अस्पतालको सिफारिसमा अन्य स्वस्थ्य तथा उपस्वास्थ्य चौकीबाट पनि कोरोना विरुद्धको खोप अभियान सञ्चालन हुने छ ।

जिल्ला अस्पताललाई भने कोरोनाविरुद्धको खोप केन्द्रको रुपमा तयार गरिएको मन्त्रालयको भनाई छ । मन्त्रालयले आजसम्म देशका सबै प्रदेशमा कोरोना विरुद्धको खोप पुगिसकेको दाबी गरेको छ। शुरुमा देशभर फ्रन्टलाईनमा खटिएका झण्डै पौने पाँच लाखलाई खोप लगाईने तयारी छ ।

त्यसका लागि खोप केन्द्रको छनौट, खोपलाई आवश्यक पर्ने तापक्रमको व्यवस्थापनलगायतका सबै कामको तयारी पुरा भएको सम्बन्धित जिल्ला अस्पतालले जनाएको छ । प्रधानमन्त्री केपी शर्मा ओलीले बुधबार बिहान १० बजे खोप लगाउने कार्यक्रमको उद्घाटन गर्ने तयारी गरेका छन् ।

Comment from facebook