चलचित्र नायक अनमोल केसीविरुद्ध लाखौं ठगीको आरोपमा प्रहरीमा उजुरी

Best Khabar Team | २०७६ फाल्गुन १६ गते शुक्रबार

२८ फेब्रुअरी, २०२०
काठमाडौं । पछिल्लो समयमा नेपाली चलचित्रमा चर्चामा रहेका नवनायक अनमोल केसीविरुद्ध प्रहरीमा ठगीको उजुरी दर्ता भएको छ । चलचित्रका पुराना नायक भुवन केसीका पुत्रसमेत रहेका नायक केसी विरुद्ध चलचित्रमा अभियन गर्ने भनेर पेश्की लिएर पनि अभिनय नगरेको भन्दै आज काठमाडौंस्थित महानगरीय प्रहरी परिसरमा उजुरी परेको हो ।

‘धुरौरो’ नामक नेपाली चलचित्रमा अभियन गर्नका लागि सहमति गरी नायक केसीले ५ लाख रुपियाँ पेस्की समेत लिएसकेको भएपनि उनले अभिनय गर्न इन्कार गरेर आफूहरुमाथि ठगी गरेको भन्दै चलचित्रका निर्माता जयन श्रेष्ठ र रुपेश खड्कीले आज काठमाडौं प्रहरीमा उजुरी दर्ता गराएका हुन् ।

चलचित्र धुपौरो फिलिम्स नेपाल र जयन श्रेष्ठ इन्टरटेटमेन्ट प्रालिले संयुक्त रुपमा निर्माण गर्न लागेको चलचित्रका लागि केसीलाई कुल ४० लाख रुपैयाँ दिने सहमति भएको बताइएको छ । यो सहमति अनुसार असोज ३ गते अनमोललाई ५ लाख अग्रिम भुक्तानी समेत गरिएको भएपनि फाल्गुन वितिसक्दा लाग्दा समेत उनले फिल्ममा अभिनय गर्न नमानेर आफूमाथि ठगी गरेको उजुरीकर्ताको दाबी छ ।

उजुरीमा फिल्मका लागि शरीर बनाउन जिम क्लास तथा अन्य व्यायमलगायतका लागि खर्च चाहिएको भन्दै थप २ लाख ५० हजारसमेत उल्लेख छ । उजुरीमा फिल्मका कलाकार तथा अन्य प्राविधिकहरुलाई समेत केसीकै दबाबमा ३० लाख रुपैयाँ अग्रिम भुक्तानी गरेको उजुरीमा उल्लेख छ । रकम लगेपछि अनमोल केसी सम्पर्कमा नआएको भन्दै तत्काल ठगी मुद्दामा उनीमाथि कारबाही गर्न उजुरीकर्ताले प्रहरी समक्ष अनुरोध गरेका छन् ।