स्वास्थ्यकर्मीमा कोरोना संक्रमण देखिएपछि काठमाडौं मेडिकल कलेज अनिश्चित समयका लागि बन्द

Best Khabar Team | २०७७ जेठ २१ गते बुधबार

०३ जुन, २०२०
काठमाडौं । काठमाडौंको सिनामंगलमा रहेको ‘काठमाडौं मेडिकल कलेज तथा शिक्षण अस्पताल’ अनिश्चित समयका लागि बन्द भएको छ । अस्पतालमा कार्यरत दुई स्वास्थ्यकर्मी तथा उपचारका लागि आएका दुईजना विरामीमा कोरोना देखिएपछि अस्प्तालले अर्को सूचना जारी नहुञ्जेलका लागि अस्पताल बन्द गर्ने निर्णय गरेको हो ।

अस्पतालमा उपचारमा आएका दुईजना विरामी र उनीहरुको उपचारमा संलग्न २ जना चिकित्सक गरी अस्पतालको सम्पर्कमा रहेका ४ जनामा कोरोना संक्रमण पुष्टि भएपछि अस्पताल निर्मूलीकरणका लागि भन्दै अनिश्चित समयका लागि बन्द गरिएको अस्पतालले आज एक सूचना जारी गरेर जानकारी गराएको छ । अस्पतालका अनुसार अब अर्को सूचना जारी नहुञ्जेलका लागि अस्पतालको आकस्मिकसहितका सबै सेवा बन्द गरिएको छ । स्वास्थ्यकर्मीलाई नै कोरोना देखिएपछि सुरक्षाको दृष्टिकोणले अस्पताल बन्द गर्नुपरेको भन्दै अस्पताल फेरि कहिले सञ्चालन गर्ने भन्ने जानकारी अर्को सूचना निकालेर गराईने अस्पताल प्रशासनले बताएको छ ।

अस्पतालले अहिले विशेषज्ञहरुको सहारामा अस्पतालका सबै विभागलाई निर्मूलिकरण गर्ने तयारी थालेको छ । यसअघि हिजो स्वास्थ्य मन्त्रालयले अस्प्तालका चारजना स्वास्थ्यकर्मीमा कोरोना संक्रमण पुष्टि भएको जनाएको थियो । तर अस्पतालले भने चारैजना स्वास्थ्यकर्मी नभएको भन्दै दुईजना स्वास्थ्यकर्मी र दुईजना अस्पतालमा उपचारका लागि आएका विरामी भएको स्पष्ट पारेको छ ।

Comment from facebook