चितवन राष्ट्रिय निकुञ्जभित्र एकैदिन २ वटा गैंडा मृत भेटियो

Best Khabar Team | २०२६ पुष १७ गते बिहिबार

१९ जुलाई, २०२१
मेघौली, चितवन । चितवनको राष्ट्रिय निकुञ्ज क्षेत्रभित्र एकैदिन दुईवटा गैडा मृत अवस्थामा भेटिएका छन् । चितवन राष्ट्रिय निकुञ्ज स्रोतले दिएको जानकारी अनुसार कसरा र अमलटारीमा क्रमशः बच्चा (अन्दाजी ३ महिनाको) गैडा तथा अर्को अन्दाजी २८/३० वर्षको गैंडा मृत अवस्थामा भेटिएको हो । विगतमा गैंडाको खाग तथा खुर तस्करीमा संलग्न गिरोहले गैंडा मार्ने गरेको भएपनि यसपटक भने बच्चा गैंडालाई बाघले आक्रमण गरी मारेको निकुञ्जले जनाएको छ ।

मृतक अर्को गैंडा २८ देखि ३० वर्षको हुनसक्ने अनुमान गरिएको छ । कसराको जंगलभित्र मृत अवस्थामा फेला परेको बच्चा गैंडा अन्दाजी ३ महिनाको हुनसक्ने अनुमान गरिएको छ । अर्को गैंडाको मृत्युको कारण भने अहिलेसम्म खुल्न सकेको छैन । निकुञ्ज प्रशासनले भने गैंडाको मृत्युको कारण खोजिरहेको बताइएको छ । एकैदिन मृत भेटिएका दुईवटै गैंडाको खाग तथा खुर सुरक्षित रहेको बताइएको छ ।

दुर्लभ बन्यजन्तुको रुपमा रहेको एकसिंगे गैंडाको चोरीशिकारी व्यापक हुने गरेको भएपनि यसलाई रोक्नतर्फ निकुञ्ज प्रशासनले उचित ध्यान दिन सकिरहेको छैन । फलस्वरुप गत आर्थिक वर्षमा मात्रै निकुञ्जभित्र चोरी शिकारी गर्ने उद्देश्यले करिब आधादर्जन गैंडाको शिकार भएको थियो । अन्य कारणले चितवन निकुञ्जभित्र विगत डेढ वर्षयता ३२ गैडाको मृत्यु भएको निकुञ्जको तथ्यांकमा उल्लेख छ ।