अष्ट्रेलियाले विदेशी नागरिकलाई प्रवेशमा रोक लगायो, ६ महिनासम्म यो क्रम निरन्तर रहनसक्ने

Best Khabar Team | २०२६ पुष १७ गते बिहिबार

१९ मार्च, २०२० सिड्नी । कोरोना भाईरस (कोभिड १९) को प्रकोप रोक्न अष्ट्रेलियाले विदेशी नागरिकहरुलाई स्वदेश प्रवेशमा रोक लगाएको छ । अष्ट्रेलियाले आफ्ना देशका नागरिक बाहेक अन्य देशबाट अष्ट्रेलिया आउने नागरिकहरुलाई अर्को सूचना जारी नहुञ्जेलका लागि प्रवेशमा रोक लगाएको हो । यो नियम शुक्रबार (मार्च २०) स्थानीय अनुसार राति ९ बजेबाट लागू हुने छ ।

यहाँका प्रधानमन्त्री स्कट मरिसनले कोरोनाको प्रकोप तथा सम्भावित जोखिम रोक्नका लागि यो निर्णय लिइएको बताएका छन् । यो अवधी कम्तीमा ३ महिनादेखि अवस्था हेरी ६ महिनासम्म जारी रहनसक्ने प्रधानमन्त्री मरिसनको भनाई छ ।

विश्वका विभिन्न देशले आफ्ना देशका नागरिकहरुको सुरक्षाका लागि भन्दै सिमाबन्ददेखि अन्र्तराष्ट्रिय उडानहरुसमेत रोकिसकेको सन्दर्भमा अष्ट्रेलियाले पनि तत्काल विदेशी नागरिकलाई अष्ट्रेलिया प्रवेशमा रोक लगाउने निर्णय गरेको हो । यो समाचार तयार पार्दासम्म अष्ट्रेलियाका विभिन्न शहरमा गरी ६ सय ३६ जनामा कोरोनाको संक्रमण देखिएको छ । जसमध्ये ६ जनाले ज्यान गुमाईसकेका छन् ।