पोर्चुगलमा विद्यालयकी शिक्षिकामै कोरोना संक्रमण, विद्यार्थी र शिक्षकलाईसमेत ‘आइसोलेसन’मा राखियो

Best Khabar Team | २०७६ फाल्गुन २२ गते बिहिबार

०५ मार्च, २०२०
पोर्तिमाउ । युरोपेली मुलुक पोर्चुगलमा पछिल्लो ७२ घण्टायता २ जनाबाट शुरुभएको कोरोनाको संक्रमण बिहीबार साँझसम्म आइपुग्दा ९ जनामा फैलिएको छ । पछिल्लो समयमा राजधानी लिस्बोनको पूर्वमा अवस्थित आरादोराको माध्यमिक तहको विद्यालयमा पढाउने शिक्षिकामै कोरोनाको संक्रमण भेटिएको हो ।

कोरोनासँग मिल्दोजुल्दो लक्षण देखिएपछि ती शिक्षिकालाई केही समय अघि क्यारेन्टाईनमा राखेर उनको खकार परिक्षण गरिएको थियो । परीक्षणबाट उनमा कोरोना पोजेटिभ भएको भेटिएपछि विद्यालयका शिक्षक तथा ६ वटा कक्षाका विद्यार्थीहरुलाई समेत आइसोलेसनमा राखिएको छ ।

युरोपमा सबैभन्दा बढी कोरोना प्रभावित मुलुक इटली घुमेर केहीसमयअघि फर्केकी ती पोर्चुगिस शिक्षिकामा कोरोनाको भाइरस देखिएपछि सो विद्यालयका शिक्षण तथा कर्मचारीलाई पनि आइसोलेसनमा राखिएको यहाँका सञ्चारमाध्यमले जनाएका छन् । पोर्चुगलको उत्तरी शहर पोर्तोमा पहिलो पटक २ जनामा कोरोना संक्रमण देखिएको भएपनि बिहीबार साँझसम्म यो संख्या बढेर ९ पुगेको छ ।

जसमा दुई जना महिला कोरोना संक्रमणमा परेका छन् । कोरोनाको संक्रमण बढ्दै गएपछि यहाँको प्रहरी तथा नियमक निकायहरुले सावधानी अपनाउन विशेष आग्रह गरेका छन् ।