हतियाधारीद्वारा नाइजेरियाको विद्यालयमा आक्रमण : ३०० बढी छात्राहरुको अवस्था ‘अज्ञात’

Best Khabar Team | २०७७ फाल्गुन १४ गते शुक्रबार

२६ फेब्रुअरी, २०२१
नाइजर, नाइजेरिया । अफ्रिकी महादेश अन्तर्गत पर्ने नाइजेरियाको उत्तरपश्चिममा अवस्थित जम्फरा राज्यको एक विद्यालयमा हतियारधारीहरुले आक्रमण गरेका छन् । सरकारी पोशाक लगाएर आएका सयौंका संख्यामा रहेका हतियारधारीहरुले आज बिहान स्थानीय समय अनुसार आज बिहानको समयमा विद्यालय सञ्चालन भै रहेका बेला घेरा हालेर आक्रमण गरेका थिए ।

अत्याधुनिक बन्दुक तथा अन्य हतियारसहित विद्यालय पुगेका हतियारधारीहरुले विद्यालयलाई पूर्णरुपमा नियन्त्रणमा लिनुका साथै त्यहाँ रहेका विभिन्न कक्षामा अध्ययनरत ३ सय भन्दा बढी छात्राहरुलाई ‘अपहरण’ गरेको विविसीले उल्लेख गरेको छ । हतियारधारी समूहले विद्यालयमा आक्रमण गरेलगत्तै छात्राहरुलाई गाडीमा हालेर लगेको प्रत्यक्षदर्शीहरुले बताएका छन् । यद्यपि यो घटनाको बारेमा विस्तृत विवरण प्राप्त हुन सकेको छैन ।

विशेष गरी विद्यार्थीहरुलाई अपहरण गरी उनीहरुको परिवारसँग मोटो रकम फिरौती माग्ने काममा हतियारधारी समूह संलग्न हुँदै आएका छन् । यसअघि छिमेकी राज्य नाइजरको एक विद्यालयमा पनि केही छात्राहरुको अपहरण गरेको थियो । अपहरणमा परेका केही छात्रालाई छाडेपनि अहिले पनि दर्जनौ छात्रा अपहरणकारीहरुकै पञ्जामा रहेको बताइएको छ ।

नाइजेरियामा विगत लामो समयदेखि अपहरणकारीहरुले विभिन्न खालको अपहरणको घटना घटाउँदै आएका छन्।