विप्लव समूह र प्रहरीबीच पूर्वी नेपालमा गोली हानाहान : २ को मृत्यु एक घाईते

Best Khabar Team | २०७६ असार २५ गते बुधबार

१० जुलाई, २०१९
काठमाडौं । पूर्वी नेपालको भोजपुर जिल्लामा सरकारद्वारा प्रतिबन्धित नेत्र विक्रम चन्द समूहको नेकपाका कार्यकर्ता र प्रहरीबीच भएको भिडन्तमा दुई जनाको ज्यान गएको छ । प्रहरीले दिएको जानकारी अनुसार सादा पोसाकमा रहेका प्रहरीमाथि चन्द समूहका कार्यकर्ताले गोली चलाएपछि जवाफी कारबाहीमा प्रहरीले पनि गोली चलाएको थियो । घटनामा परी नेकपा चन्द समूहका एक र प्रहरीतर्फ पनि एकजनाको ज्यान गएको छ । पछिल्ला केही महिनायता प्रहरीले चन्द समूहले पूर्वी नेपालका विभिन्न जिल्लालाई केन्द्रीत गरी गतिविधि चलाइरहेको सूचना पाएपछि गस्ती बढाएको थियो । यही क्रममा आज भोजपुरको सदरमुकाम हटिया नजिकै भिडन्त भएको र घटनामा दुई जनाको ज्यान गएको हो ।

ज्यान गुमाउनेमा प्रहरी जवान सञ्जीव राई र चन्द समूहका कार्यकर्ता निरकुमार राई रहेका छन् । घटनामा परी अर्का प्रहरी जवान सोम भट्टराई घाईते भएका छन् । उनको जिल्ला अस्पतालमा उपचार भै रहेको छ । आज बिहान चन्द समूहका कार्यकर्ता होटलमा मदिरा पिएर बसेको सूचना पाएपछि प्रहरी सादा पोशाकमा त्यहाँ पुगेको थियो ।

त्यस क्रममा प्रहरी र चन्द समूहका कार्यकर्ताबीच विवाद भएपछि पहिला चन्द समूहले गोली चलाएको चन्द समूहले बताएको छ । त्यसको जवाफी कारबाहीमा प्रहरीले पनि फायर खोलेको थियो । मृतक प्रहरी जवान विगत लामो समयदेखि जिल्ला प्रहरी कार्यालयमा कार्यरत रहेको बताइएको छ ।

यस्तै मृतक चन्द समूहका राई सरकारले चन्द समूहको गतिविधिमाथि प्रतिबन्ध लगाएपछि भूमिगत रुपमा गतिविधि गर्दै आइरहेको छ । घटनाको विषयमा जानकारी दिन प्रहरीले केन्द्रीय अनुसन्धान टोली घटनास्थल पठाएको छ । चन्द समूहको गोली लागेर प्रहरी मारिएको यो पहिलो घटना हो । सरकारले चन्द समूहलाई प्रतिबन्ध लगाएपछि काठमाडौंलगायतका स्थानमा भएको विस्फोट तथा गोली काण्डमा गरी झण्डै एक दजर्ननले ज्यान गुमाईसकेका छन् । यस्तै काभ्रेमा केही हप्ताअघि चन्द समूहका केन्द्रीय नेताको पनि प्रहरी कारबाहीमा मृत्यु भएको थियो ।

Comment from facebook