विदेशी सैनिकलाई तत्काल देश छाड्न इराकी संसदको निर्देशन

Best Khabar Team | २०७६ पुष २१ गते सोमबार

०६ जनवरी, २०२०
बग्दाद । इराकले देशमा तैनाथ सबै विदेशी सैनिकलाई तत्काल देश छाड्न निर्देशन दिएको छ । हिजो बसेको इराकको संसदले अमेरिकीलगायत इराकमा तैनाथ सबै विदेशी नागरिकलाई तत्काल देश छाड्न निर्देशन दिएको हो । पछिल्ला दिनहरुमा अमेरिकी सैनिकहरुको आक्रममा परी इरानी सैन्य कमान्डरको बग्दादमा मृत्यु भएपछि इराकको संसदले यो निर्देशन दिएको हो ।

आफ्नो देशको आन्तरिक समस्या समाधान गर्न आफूहरु स्वयं सक्षम रहेको भन्दै इराकले भोलिका दिनमा कुनैपनि विदेशी सैनिक या सहयोग नलिने गरी निर्णय गराउन सरकारलाई निर्देशन समेत दिएको छ । संसदले तत्काल अमेरिकी सययोग बन्द गर्न सरकारको ध्यानाकर्षण समेत गराएको छ । यो निर्देशन सँगै करिब ५ हजारको संख्यामा रहेका अमेरिकी सैनिकले अब इराक छाड्नुपर्ने देखिएको छ ।

संसदले तत्काल बायुसेना, जलसेना तथा स्थल सेनाको रुपमा विदेशी सैनिक प्रयोग गर्न नपाउने गरी प्रस्ताव पारित गरेको हो । केहीसाता यता अमेरिका र इराकबीचको तनावको कारण बग्दाद तनावग्रस्त बनेको छ । शुक्रबारमात्रै अमेरिकी सुरक्षाफौजले गरेको रकेट आक्रमणका क्रममा इरानी सैन्य कमान्डर कासिम सुलेमानीको ज्यान गएको थियो ।

Comment from facebook