चैत्र ७ गतेदेखि बैशाख ३ गतेसम्म युरोपलगायतका देशबाट नेपाल आउन नपाईने

Best Khabar Team | २०७६ चैत्र ५ गते बुधबार

१८ मार्च, २०२०
काठमाडौं । सरकारले पछिल्लो समयमा कोरोनाबाट महामारी फैलिएको युरोपका २७ राष्ट्रबाट नेपाल आउने स्वदेशी तथा विदेशी नागरिकलाई नेपाल प्रवेशमा रोक लगाउने निर्णय गरेको छ । कोरोना रोकथाम पूर्वतयारी समितिको आज बसेको बैठकले इटली, स्पेन, बेल्जियम, पोर्चुगल, नर्वे, स्वीडेन, जर्मनी, नेदरल्याण्ड, फिनल्याण्ड, स्वीडेन, डेनमार्कलगायत २७ वटा युरोपेली देशका नागरिक तथा त्यहाँबाट नेपाल आउने नेपाली तथा अन्य देशका यात्रुहरुलाई नेपाल प्रवेशमा रोक लगाउने निर्णय गरेको हो ।

यो निर्णय मार्च २० तारिख अर्थात चैत्र ७ गतेदेखि लागू हुने र आगामी बैशाख ३ गते अर्थात् अप्रिल १५ तारिखसम्म जारी रहने सरकारले जनाएको छ । यसका अलावा, पश्चिम एसियाली मुलुक, खाडी राष्ट्रहरु, कबुेत, मलेसिया, बहराईन, कतार साथै, इरान, टर्की, मलेसिया, दक्षिण कोरिया, जापानलागयतका नागरिकहरु तथा ती देशबाट नेपाल आउने स्वदेशी तथा विदेशी नागरिकहरुलाई चैत्र ७ गतेदेखि नेपाल प्रवेशमा रोक लगाउने निर्णय सरकारले गरेको हो । रक्षामन्त्री ईश्वर पोखरेल संयोजकत्वको कोभिड–१९ संक्रमण रोकथाम तथा नियन्त्रण उच्चस्तरीय समन्वय समितिले यो निर्णय गरेको हो ।

सरकारले आवागमनमा लगाएको प्रतिबन्धका कारणले आफ्नो मुलुक फिर्ता जान नसकेका नेपालस्थित विदेशी नागरिकको भिसा अवधि नियमित गर्न गृह र परराष्ट्र मन्त्रालयले सम्बन्धित देशका पर्यटकसमक्ष समन्वय गर्ने जनाएको छ । सरकारले यसअघि विभिन्न देशका नागरिकहरुलाई नेपालको विमानस्थलमा दिईँदै आएको अनअराईभल भिषा तत्कालका लागि रोक्ने निर्णय गरेको थियो ।