काठमाडौंमा भूमिगत ढंगले सञ्चालित विप्लव समूहको कार्यालयमा प्रहरी छापा, ६ जना हतियारसहित पक्राउ

Best Khabar Team | २०२६ पुष १७ गते बिहिबार

२३ डिसेम्बर, २०१९
काठमाडौं । सरकारद्वारा प्रतिबन्धित नेत्रविक्रम चन्द नेतृत्वको राजनीतिक समूहले काठमाडौंमा भूमिगत ढंगले सञ्चालन गरेको कार्यालयमा प्रहरीले छापा मारेको छ । प्रहरी स्रोतका अनुसार विगत केही महिना यता चन्द समूहले काठमाडौंको हात्तिगौंडामा गोप्य ढंगले सञ्चालन गरिरहेको सो कार्यालयमा प्रहरीले आइतबार छापा मारेको हो ।

छापा मार्ने क्रममा प्रहरीले समूहका ६ जना कार्यकर्तालाई हतियारसहित पक्रेको छ । विशेष सुराकीका आधारमा प्रहरीले बुढानिकलकण्ठ जाने बाटोमा पर्ने हात्तिगौंडास्थित एक घरमा सञ्चालन गरिएको कार्यालयमा छापा मारेको हो । त्यस क्रममा प्रहरीले पेस्तोल, बम बनाउन प्रयोग हुने तार, पेस्तोलमा लाग्ने म्याग्जिन, डेटोनेटरलगायत विस्फोटमा प्रयोग गरिने सामग्रीसमेत बरामद गरेको छ ।

पक्राउ परेकाहरु चन्द निकटको नेकपा युवा संगठनका मध्यकमाण्डर इन्चार्ज सञ्जीव लामा, कोषाध्यक्ष तिलकबहादुर गुरुङ, केन्द्रिय सदस्य तथा कार्यालय सचिव वकिल घर्ती मगर, युवा संगठन सोलुखुम्बु इन्चार्ज त्रिलोचन विक र उदयपुरका सदस्य दुर्खाबहादुर तामाङरहेको प्रहरीले जनाएको छ । गत चैत्रमा काठमाडौंको बसुन्धरामा बैदेशिक रोजगार व्यवसायी महासंघका अध्यक्षको घरमा सिलिण्डर बम विस्फोटमा पक्राउ परेका लामा समेत संलग्न रहेको प्रहरीको अनुसन्धानले देखाएको छ ।

पक्राउ परेकाहरुलाई हातहतियार तथा खरखजनासम्बन्धी मुद्दा चलाइने प्रहरीको भनाइ छ । सरकारले चन्द समूहलाई प्रतिबन्धलगायसँगै देशैभरी उसका गतिविधिसमेत नियन्त्रण गर्दै आइरहेको छ ।