के नेपालमा उल्का पिण्ड खसेकै हो त ?

Best Khabar Team | २०७६ चैत्र १३ गते बिहिबार

२६ मार्च, २०२०

पोखरा । आज राती करिब ८ बजेतिरको समयमा पश्चिम नेपालका अधिकांश जिल्लाका स्थानीय वासिन्दाले आकाशमा उज्यालो मुस्लो देखेको बताएका छन् । पश्चिम नेपालको कास्की, पर्वत, बाग्लुङ्ग, स्याङ्गजालगायतका जिल्लाका स्थानीय वासिन्दाका अनुसार राती ८ बजेको समयमा उत्तरबाट दक्षिण दिशातर्फ सुसाउँदै सो उज्यालो बस्तु अघि बढेको बताइको छ । सो बस्तु पर्वत, स्याङ्गजा र बाग्लुङ्गका अधिकांश स्थानीय वासिन्दाले आकाशमा देखेको भन्दै सामाजिक सञ्जालहरुमा त्यसको तस्वीर पनि सार्वजनिक भएको छ ।

अपुष्ट समाचार अनुसार सो उज्यालो बस्तु पर्वत जिल्लाको कुर्घा आसपासमा ठूलो आवाजसहित जमिनमा खसेको बताइएको छ । तर यसको औपचारिक पुष्टि यो समाचार तयार पार्दासम्म भएको छैन । कुर्घाका एक स्थानीयले आफ्नो फेसबुक पेजमा यसको जानकारी राखेका छन् । रातीको समयमा आकाशमण्डलमा देखिएको यस्तो बस्तु उल्कापिण्ड भएको हुनसक्ने नेपाल एष्टोनोमिकल सोसाईटीले जनाएको छ ।

सोसाईटलीले एक विज्ञप्ति जारी गर्दै उल्का खसेको भन्ने जानकारी आफूहरुले पनि पाएको भन्दै यसको विषयमा सत्य तथ्य जानकारी गराउन भनेको छ । यदि कुनै जिल्ला वा ठाउँमा सो खसेको भए यसको बारेमा फोटो वा कुनै प्रमाणसहित जानकारी गराएर सोसाईटीलाई सहयोग गर्न विज्ञप्तिमा भनिएको छ । पर्वत र बाग्लुङ्गको दक्षिण क्षेत्रमा सो ठूलो आवाजसहित देखिएको त्यहाँका स्थानीयको भनाई छ ।