मध्यरातमा पहिरोले घर पुर्दा कालीकोटमा ४ को मृत्यु, अरु ४ बेपत्ता

Best Khabar Team | २०७७ श्रावण १४ गते बुधबार

२९ जुलाई, २०२०
मान्मा, कालीकोट । बिकट पहाडी जिल्ला कालीकोटमा अविरल वर्षापछि आएको पहिरोले घर पुर्दा एकै परिवारका ४ जनाको ज्यान गएको छ । जिल्लाको नरहरीनाथ गाउँपालिका वडा नम्बर ७ मा पर्ने माल्कोटमा घरमाथिको जमिन पहिरिएपछि स्थानीय गंगे बुढाको घर पुगेको थियो । मध्यरातमा सुतिरहेका बेला एक्कासी खसेको पहिरोले घर पुर्दा गंगे बुढासहित उनकी श्रीमती, बुहारी र नातिनीको ज्यान गएको हो ।

सो घटनामा परी अरु २ जना वेपत्ता भएको नरहरीनाथ गाउँपालिकाले जनाएको छ माल्कोटको बागामा भएको सो घटनामा हराईरहेका दुईजना बालक ७ वर्षका रामबहादुर बुढा र करिब २ वर्षका चरित्र बुढाको खोजी कार्य जारी रहेको छ । सोही गाउँपालिकाको वडा नम्बर नम्बर ४ माझगोठीमामा पनि पहिरोमा परी स्थानीय बाले बुढा र उनकी श्रीमती वेपत्ता भएकी छन् । घर माथिको थाप्लोबाट खसेको पहिरोले घर बगाउँदा बुढा दम्पत्ति वेपत्ता भएका हुन् ।

वेपत्ता भएकाहरुको खोजी कार्य जारी रहेको प्रहरीको भनाई छ । विगत केहीदिनयता परेको अविरल वर्षात्का कारण कालीकोटका विभिन्न भागमा पहिरोले ठूलो क्षति पु-याएको छ । विशेष गरी कच्ची सडक आसपासका बस्तीहरु जोखिममा परेका छन् । यसैपनि विकट कालिकोटमा वर्षात्का कारण सदरमुकामसँगको सडक सञ्जाल टुटेपछि कतिपय गाउँका स्थानीय वासिन्दामा दैनिक उपभोग्य बस्तुको अभावसमेत देखिन थालेको बताइएको छ ।