कोरोनाबाट ज्यान गुमाउनेको संख्या ३ लाख नाघ्यो, विश्वभरको पर्यटकीय गतिविधि ठप्प

Best Khabar Team | २०७७ जेठ १ गते बिहिबार

१४ मे, २०२०
काठमाडौं । महामारीको रुपमा फैलिएको कोरोना भाइरसका कारण विश्वभर ज्यान गुमाउनेको संख्या ३ लाख नाघेको छ । कोरोना भाइरसबारे प्रत्यक्ष रिर्पोटिङ्ग गर्ने ओल्डोमिटर डटकमले सार्वजनिक गरेको तथ्यांक अनुसार बिहीबार राती नेपाली समय १० बजेसम्ममा विश्वका विभिन्न मुलुकबाट ३ लाख २ सय २० जनाले कोरोनाका कारण ज्यान गुमाएका छन् । यस्तै ४४ लाख ७८ हजार ५ सय ६५ जना संक्रमित बनेका छन् ।

संक्रमितमध्ये १६ लाख ८२ हजार ८ सय ७२ जना उपचारपछि स्वास्थ्यलाभ गरी घर फर्केका छन् । कोरोनाका कारण सबैभन्दा धेरै प्रभावित भएको देशको पहिलो नम्बरमा अहिले अमेरिका परेको छ । अमेरिकामा हालसम्म कोरोनाका कारण ८५ हजार ४ सय ६३ जनाले ज्यान गुमाईसकेका छन् । अमेरिकामा १४ लाख ३६ हजार ५ सय १६ जनामा कोरोना संक्रमण देखिएको छ । ती मध्ये ३ लाख १० हजार ८ सय ३४ जना निको भएका छन् । यस्तै स्पेनमा २ लाख २७ हजार ६ सय ४६ जना संक्रमित भएका छन् भने २७ हजार ३ सय २१ जनाले ज्यान गुमाएका छन् ।

यस्तै रसियामा २ लाख ५२ हजार २ सय ४५ संक्रमित देखिएका छन् भने २ हजार ३ सय ५ जनाको ज्यान गएको छ । बेलायतमा २ लाख ३३ हजार १ सय ५१ जना संक्रमितमध्ये ३३ हजार ६ सय १४ जनाको ज्यान गएको छ । यस्तै इटलीमा २ लाख २३ हजार ९६ जना संक्रमित भेटिएका छन् । इटलीमा हालसम्म ३१ हजार ३ सय ६८ जनाको कोरोनाका कारण ज्यान गएको छ ।

इटलीपछि युरोपेली मुलुक फान्समा २७ हजार ७४ जना, जर्मनीमा ७ हजार ८ सय ६८ जना, ब्राजिलमा १३ हजार ५ सय ५१ जना, टर्कीमा ३ हजार ९ सय ५२ र इरानमा ६ हजार ८ सय ५४ जनाको ज्यान गएको छ । यस्तै चीनमा ४ हजार ६ सय ३३ जनाको ज्यान कोरोनाका कारण गएको छ । भारतमा २ हजार ५ सय ६४ जनाको ज्यान कोरोनाका कारण गएको छ । कोरोनाका कारण विश्वका १ सय ९५ भन्दा बढी मुलुकहरु प्रभावित बनेका छन् ।

जसका कारण विश्वभरको पर्यटकीय तथा आर्थिक गतिविधि थप्पप्राय बनेको छ । गर्मीका महिनामा करोडौं पर्यटकको चहलपहल हुने विश्वका विकसित देशहरु तथा युरोपेली मुलुकहरुमा यतिबेला पर्यटकहरु सून्य छन् । जसका कारण एयरलाईन्स कम्पनी, होटल तथा रेस्टुरेन्ट सञ्चालकलगायतले करोडौंको क्षति बेहोर्नुपरेको छ ।

यो वर्ष विश्वभर कोरोनाको त्रास जारी रहेका कारण पर्यटकीय गतिविधिमा निक्कै ह्रास आउने अनुमान यस क्षेत्रका विज्ञहरुले गरेका छन् । जसका कारण नेपाललगायत विश्वका विभिन्न पर्यटकीय क्षेत्रमा काम गर्ने लाखौं कामदार प्रभावित भएका छन् । यस्तै हजारौंको जागिर समेत गुमेको छ ।

गत डिसेम्बरको अन्तिम साता चीनको बुहान प्रान्तबाट देखिएको कोरोना भाइरसले यतिबेला विश्वभर ताण्डब मच्चाईरहेको छ । हालसम्म कोरोना नियन्त्रणको लागि न कुनै औषधी उपयोगी सिद्ध बनेको न त कुनै भ्याक्सिन नै बनेको छ ।