क्यानडा र अमेरिकाको सिमाना थप एक महिनाका लागि बन्द

Best Khabar Team | २०७७ जेठ ६ गते मंगलबार

१९ मे, २०२०
टोरन्टो । क्यानडा र अमेरिकाले दुईदेशबीचको सीमा नाका थप एक महिनाका लागि बन्द गर्ने निर्णय गरेको छ । अमेरिका र क्यानडा दुईदेबीच सरकारी स्तरमा भएको सहमति अनुसार आगामी जुन २१ तारिखसम्मका लागि दुबै देशको सिमानाका बन्द गर्ने निर्णय भएको क्यानडा सरकारले आफ्नो आधिकारिक वेवसाईटमा उल्लेख गरेको छ । कोरोना भाइरस (कोभिड १९) को संक्रमण फैलन नदिनका लागि एक अर्को देशबीचको सिमानाका बन्द गर्ने निर्णय भएको क्यानडाका सञ्चारमाध्यमहरुले जनाएका छन् ।

यद्यपि सिमानाका बन्द भएपनि अत्यावश्यकीय सेवा प्रवाह गर्ने सवारी साधन तथा त्यसमा खटिएकाा जनशक्तिले निर्वाध रुपमा आफ्नो गन्तव्यमा पुग्नका लागि यात्रा गर्न पाउने उल्लेख गरिएको छ । यसअघि मे १८ सम्मका लागि दुईदेशबीचको सिमा बन्द गर्ने सहमति भएको थियो ।

पछिल्ला दिनमा दुबै देशमा कोरोना संक्रमितको संख्या दिनहुँ बढ्दै गएपछि थप १ महिनाका लागि सिमानाका बन्द गर्ने निर्णय भएको हो । गतमार्च मार्च १८ देखि अमेरिका र क्यानडाले पहिलो पटक कोरोनालाई मध्यनजर गर्दै सिमानाका बन्द गर्ने घोषणा गरेको थियो । यद्यपि दुबै देशमा रोकिएर रहेका एक अर्को देशका नागरिकहरुले पनि निर्वाधरुपमा आफ्नो देशमा प्रवेश गर्न पाउने सहमतिपनि दुईदेशबीच भएको छ ।

अमेरिकामा यो समाचार तयार पार्दासम्म कोरोनाका कारण ९२ हजार ८ सय १२ जनाको ज्यान गै सकेको छ भने १५ लाख ६१ हजार ७ सय ६६ जनामा कोरोनाको संक्रमण देखिएको छ । यस्तै क्यानडामा भने हालसम्म ७९ हजार ७० जनामा संक्रमण देखिएको छ । ती मध्ये ५ हजार ९ सय ९ जनाको ज्यान गै सकेको छ ।