जेठ २० सम्मलाई थपियो उपत्यकामा निषेधाज्ञा : यसअघि जारी गरिएका सबै सवारी पास खारेज, खाद्यान्न पसल पनि खोल्न नपाईने

Best Khabar Team | २०२६ पुष १७ गते बिहिबार

२५ मे, २०२१
काठमाडौं । काठमाडौं उपत्यकामा आगामी जेठ २० गतेसम्मका लागि निषेधाज्ञा थप गरिएको छ । उपत्यकाको काठमाडौं, ललितपुर र भक्तपुरका प्रमुख जिल्ला अधिकारीहरु सम्मिलित संयुक्त बैठकले कोरोनाको जोखिम कायमै रहेको भन्दै जारी निषेधाज्ञा एकसाताका लागि थप्ने निर्णय गरेको हो । यो निर्णयसँगै अब उपत्यकामा आगामी जेठ २० गते रातीसम्म निषेधाज्ञा थप भएको छ । काठमाडौं उपत्यकाको जनसंख्या, यहाँभित्र देखिएको दैनिक कोरोना संक्रमितको संख्यालगायतलाई आधार बनाएर लकडाउन लब्याइएको बैठकपछि जारी गरिएको विज्ञप्तिमा उल्लेख छ ।

यस्तै यसपटकको लकडाउनमा खाद्यान्न पसलहरुसमेत सञ्चालन गर्न रोक लगाइने भएको छ । सरकारको यो निर्णय सँगै अब भोलिदेखि जेठ २० गतेसम्मका लागि काठमाडौंमा खाद्यान्न पसल सञ्चालन गर्न पाइने छैन । तर हरियो तरकारीहरुको विक्री वितरण गर्ने पसलहरुले भने बिहान ९ बजेसम्म मात्रै तरकारी विक्री वितरण गर्न पाउने भएका छन् । यस्तै यसअघि जारी गरिएका सवारी पासहरुसमेत खारेज गरिएको विज्ञप्तिमा उल्लेख छ ।

मृत्यु, विवाहलगायतका संस्कारका कार्यहरुमा सहभागी हुनेहरुले भने सरकारी मापदण्डलाई पालना गर्दै सवारी साधन सञ्चालनमा ल्याउन पाउने भएका छन् । यसअघि सरकारले कोरानालाई मध्यनजर गर्दै जारी गरेको निषेधाज्ञा उल्लंघन गर्ने जरिमानासहित कैद सजायाँ गर्ने जनाइसकेको छ ।