२५ वर्षपछि विस्तार हुँदै अरनिको राजमार्गको सूर्यबिनायक–धुलिखेल खण्ड

Best Khabar Team | २०७९ फाल्गुन ७ गते आइतबार

१९ फेब्रुअरी, २०२३
काठमाडौं । काठमाडौं उपत्यका अन्तर्गत भक्तपुर हुँदै बाहिरिने मूख्य राजमार्ग अन्तर्गतको सूर्यबिनायक–धुलिखेल सडक खण्डको स्तरोन्नती र सडकविस्तार हुने भएको छ । अरनिको राजमार्ग अन्र्तगत सूर्यबिनायकदेखि धुलिखेलसम्मको साढे १५ किलोमिटर सडकखण्ड आगामी ३ वर्षभित्रमा सक्ने गरी ४ लेनको रुपमा विस्तार गरिने भएको छ ।

काभ्रेको धुलिखेल हुँदै काठमाडौं उपत्यका भित्रने तथा बाहिरिने मूख्य राजमार्गको रुपमा रहेको सडक सडकखण्ड २५ वर्षअघि निमार्ण गरिएको भएपनि यसको स्तरोन्नती भएको थिएन । जसका कारण पछिल्ला वर्षहरुमा उपत्यका भित्रने र बाहिरिने सवारी साधनको चाप थेग्नलाई यो सडकलाई हम्मे हम्मे पर्दै आएको थियो । साँघुरो सडककाकारण यात्रु तथा सवारीसाधनहरु घण्टौं जाममा पर्ने गरेका छन् । सडक साँघुरो हुँदा दुर्घटना पनि बढेपनि यसको विस्तार गर्नेतर्फ सडक बनेको २५ वर्षपछि मात्रै सरकारको ध्यान पुगेको छ ।

कुल ४ अर्ब ५ करोड ६४ लाख रुपैयाँको लागतमा निर्माण सम्पन्न हुने यो सडक पहिलो चरणमा साँगादेखि धुलिखेलसम्म विस्तार हुनेछ । यस्तै भक्तपुरको सूर्यविनायकदेखि काभ्रेपलाञ्चोकको साँगासम्म दोश्रो चरणमा विस्तार गर्ने गरी सम्झौता भएको भौतिक योजना तथा निर्माण मन्त्रालयले जनाएको छ । पहिलो चरणको ठेक्का प्रक्रियाको जिम्मा लामा कन्स्ट्रक्सनले पाएको छ । सूर्यबिनायकदेखि धुलिखेलसम्मको सडकको दूरी कुल १५ दशमलव ५ किलोमिटर रहेको छ ।

Comment from facebook