Best Khabar Team | २०२६ पुष १७ गते बिहिबार

---

१४ मार्च, २०२०
कोपनहेगन, डेनमार्क । डेनमार्क युरोपको यस्तो एउटा देश हो, जहाँ आजसम्म पनि कोरोनाका कारण मानिसहरुले ज्यान गुमाईरहेका छन् । संसारका अधिकांश देशहरुले हवाई, स्थलमार्ग तथा सिमानाका बन्द गरेर कोरोनासँग लड्नका लागि सिँगो देशलाई लकडाउन गरिरहेका छन् । तर महामारी जारी रहेकै बेला युरोपेली मुलुक डेनमार्कले भने प्राथमिक तहका विद्यार्थीहरुको लागि विद्यालय खुल्ला गरिदिएको छ ।
कोरोना महामारीकै बीच विद्यालय सञ्चालन गर्ने पहिलो युरोपेली मुलुक बनेको डेनमार्कले सरोकारवालाहरुसँग प्रयाप्त छलफल गरी विद्यालयको प्राथमिक तह पुनः सञ्चालन गर्ने निर्णय गरेको थियो । डेनमार्कमा गत फेब्रुअरी २७ तारिखका दिन पहिलो पटक कोरोना संक्रमित भेटिएको थियो ।

त्यो सँगै मार्चको दोश्रो सातादेखि यहाँका विद्यालयहरु बन्द गरिएको थियो । तर कोरोना भाइरस पूर्णरुपमा नियन्त्रणमा नआउँदै डेनमार्कले विभिन्न सुरक्षा साबधानी अपनाएर साना उमेर समूहका बालबालिका अध्ययन गर्ने विद्यालयहरु पुनः सञ्चालनमा ल्याएको हो । यसरी विद्यालय सञ्चालन गरिएका बालबालिकामा १२ वर्ष उमेरभन्दा मुनिका विद्यार्थीहरु रहेका छन् । यसको प्रभावकारितार्लाइ हेरेर भोलिका दिनमा अन्य तह पनि सञ्चालनमा ल्याउने तयारी सरकारको छ । कसरी सञ्चालन गरिरहेको छ त डेनमार्कले कोरोनाकै बीच प्राथमिक तहको विद्यालय ? यहाँ हामीले बिबिसीले उल्लेख गरेको सामग्री र अन्य केही इन्टरनेट खोजबाट तथ्य प्रस्तुत गरेका छन् ।

• विद्यालयमा प्रवेश गर्दा विद्यार्थीहरुले एक अर्कामा अंकमाल गर्न पाउने छैनन् । यसका लागि विद्यालयले बैकल्पिक व्यवस्था गरेको छ ।
  विद्यालयले एक आपसमा अंकमाल गर्ने विद्यार्थीहरुको पुरानो बानीलाई परिवर्तन गर्दै आफैंमा अंकमाल गर्नका लागि प्रोत्साहित गरिरहेको छ । नयाँ परिस्थितिमा नयाँ नियम लागू गर्नुपरेको भन्दै यसलाई सहज रुपमा लिन विद्यार्थीहरुलाई विद्यालयले आग्रह गरिरहेको छ ।
  विद्यार्थीहरुले भने आफ्ना साथीहरुसँग अंकमाल गर्न नपाउँदा खल्लो महशुस भएको प्रतिक्रिया दिएका छन् ।
• विद्यालय प्रवेश गरिसकेपछि कक्षाकोठामा छिर्नु अघि अनिवार्य रुपमा साबुन पानीले हात धुनुपर्नेछ ।
• शुरुमा पहिलो चरणमा सञ्चालनमा ल्याइएको प्राथमिक तहमा अध्ययन गर्ने बालबालिकाहरु बस्ने कक्षा कोठामा कम्तीमा दुई मिटरको दुरीमा टेबलहरु राखिएको छ । एउटा टेवल एकजना मात्रै विद्यार्थीको लागि छुट्टयाइएको छ जहाँ एउटा मात्रै कुर्सी लगाइएको छ ।
  सामान्यतया एउटा कक्षामा २० जना विद्यालय रहने गरेको भएपनि हाल कोरोनाको संक्रमणपछि उत्पन्न परिस्थितिलाई मध्यनजर गर्दै त्यसर्लाइ घटाएर १० मा सिमित गरिएको छ ।
• बीचमा रातो फित्ता (बार) लगाईएको छ । जसले विद्यार्थीहरुबीचको सम्पर्कलाई पनि टाढा गराईदिएको छ । यसरी फित्ता लगाइएको कक्षा कोठा भित्रका दुई समूहका विद्यार्थीहरु एक आपसमा मिसिन पाउने छैनन् । जसले गर्दा विद्यार्थीहरुमा कोरोना संक्रमणको त्रास कम हुने देखिएको छ ।
• टिफिनको समयमा सानो सानो समूहमा मात्रै बालबालिकाहरु एक आपसमा खेल्न पाउनेछन् । यसको लागि एउटा समूहमा ४ जना विद्यार्थीहरुलाई सहभागी गराईने छन् । उनीहरु एउटै ग्रुपका हुनेछन् ।उनीहरुका लागि खेल्नका लागि चौरको छुट्टाछुट्टै भाग तोकिएको छ ।
• विद्यार्थीहरुले एक आपसमा समातेर वा छोएर कुनै खेल खेल्न पाउने छैनन्
  शुरुमा उनीहरुले केही अप्ठेरो महशुस गरेको भएपनि उनीहरु पनि कोरोनाको विषयमा सचेत रहेको शिक्षकहरु बताउँछन् ।
• हरेक पटक कक्षाकोठाबाट बाहिर जाँदा र भित्र आउँदा उनीहरुले साबुनपानीले राम्रोसँग हात अनिवार्य रुपमा हुनुपर्ने हुन्छ ।
  विद्यालयका शिक्षिकाहरु ससाना बालबालिकाहरु भाइरसको बारेमा चिन्तित नभएको बताउँछन्, विद्यालयमा उनीहरुका लागि धेरै गतिविधि र समय खर्च गर्न सकिने गरी अतिरिक्त क्रियाकलाप गर्ने व्यवस्था गरिएको छ ।
• कक्षा कोठामा थोरै विद्यार्थी हुँदा आफूहरुलाई पनि सजिलो महशुस भएको शिक्षिकाहरु बताउँछन् । तर विगतमा एउटै समूहमा एकैपटक पढाउने विद्यार्थीहरुलाई अहिले दुई समूहमा विभाजन गरिँदा दुईपटक पढाउनुपर्दा भने अलिक असहज अनुभव भएको शिक्षिकाहरुको भनाई छ ।
• विद्यालयहरु सञ्चालन भएर आफ्ना नानीबाबुहरु स्कुल जाँदा आफूहरुले पनि काम गर्न पाउने भन्दै अभिभावकहरु खुसी देखिएका छन् ।
  शुरुका दिनहरुमा बालबालिकाहरु विद्यालय आउने क्रम केही कम देखिएपनि अहिले भने सबै बालबालिकाहरु विद्यालय आउने गरेका छन् ।
  उनीहरु ‘फेरि उज्यालो फर्कियो भन्ने चर्चित डेनिस गीत गाउँदै विद्यालयमा खेल्दै गरेका श्रव्यदृष्य विविसीले प्रशारण गरेको छ ।
  

डेनमार्कमा हालसम्म कोरोनाका कारण ५ सय ३७ जनाको ज्यान गएको छ भने १० हजार ७ सय १३ जना प्रभावित बनेका छन् । आजमात्रै ४६ जना नयाँ संक्रमित थपिएका छन् । डेनमार्कमा हालसम्म ८ हजार ८ सय ५ जनाको सफल उपचार भएको छ भने ३५ जना गम्भीर अवस्थामा उपचाररत छन् ।

---

Comment from facebook