भोलिदेखि तय भएको एसईइ परीक्षा अन्तिम समयमा आएर स्थगित

Best Khabar Team | २०२६ पुष १७ गते बिहिबार

१८ मार्च, २०२०
काठमाडौं । चौतर्फी दबाबपछि भोलिदेखि तय भएको माध्यमिक शिक्षा परीक्षा (एसईई) स्थगित भएको छ । यसअघि सरकारले परीक्षा केन्द्रहरुमा आवश्यक स्वास्थ्य सुरक्षा अपनाउँदै परीक्षा सञ्चालन गर्ने निर्णय गरेको भएपनि २५ जना भन्दा बढी एकैठाउँमा भेला हुन नपाउने सरकारकै अर्को निर्णयसँग परीक्षा गर्ने विषय बाझिएको थियो ।

यस्तै अहिलेको अवस्थामा परीक्षा सञ्चालन गर्दा यसले विद्यार्थीको मानसिक तथा स्वास्थ्यमा पार्नसक्ने खतरा र यसबाट आउने परीक्षाको परिणामलार्ई मध्यनजर गर्दै तत्कालका लागि परीक्षा स्थगित गरिएको सरकारी स्रोतले जानकारी दिएको छ । परीक्षा रोकिएपनि अर्को परीक्षा कहिले गर्ने भन्ने विषयमा निर्णय भने भै सकेको छैन ।

यथास्थितिमा परीक्षा सञ्चालन गर्दा विद्यार्थी तथा अभिभावक सबैमा मानसिक तनाव हुने तथा उनीहरुको स्वास्थ्यपनि जोखिममा पर्ने भन्दै तत्काल परीक्षा सार्नका लागि यसअघि सरकार र परीक्षा बोर्डलाई चौतर्फी दबाब परेको थियो । सरकारले आवश्यक तयारी तथा स्वास्थ्य डेक्स नै स्थापना गरी परीक्षाको तयारी गरेको भएपनि यसमा विद्यार्थी तथा अभिभावकले सन्तुष्टि नजनाएपछि आज साँझ सरकारले यो निर्णय लिएको हो ।

कोरोना भाइरसको प्रकोपले विश्वव्यापी असर पारिरहेको सन्दर्भमा अन्तिम समयमा आएर एसइई परीक्षा स्थगित हुँदा ५ लाख परीक्षार्थी प्रभावित बनेका छन् ।