काठमाडौंमा पक्राउ परेका चिनियाँ नागरिकबाट करोडौं मूल्यबराबरको विद्युतीय सामग्री बरामद, मोबाइलमात्रै ७ सय ४७ थान

Best Khabar Team | २०२६ पुष १७ गते बिहिबार

२६ डिसेम्बर, २०१९
काठमाडौं । सामान्यतयाः एकजना व्यक्तिले कतिवटा मोबाइल बोक्छ होला ? एक, दुई वा बढीमा तीन । तर प्रहरीले गत आइतबार राजधानीका विभिन्न स्थानमा गरेको ‘सर्च अपरेशन’का क्रममा पक्राउ परेका १ सय २२ जना चिनियाँ नागरिकको साथबाट ७ सय ४७ थान मोबाइल बरामद गरेको छ । पक्राउ परेका चिनियाँ नागरिक र उनीहरुबाट बरामद गरिएको मोबाइलको संख्याको अनुपात हेर्ने हो भने एक चिनियाँ नागरिक बराबर ६ वटा मोबाइल बरामद भएको प्रहरीले जनाएको हो ।

प्रहरीले गरेको अपरेशनका क्रममा पक्राउ परेका चिनियाँ नागरिकहरुको साथबाट ३ सय ३१ ल्यापटप समेत बरामद गरेको छ । यस हिसावले हेर्दा एक व्यक्ति बराबर २ वटा ल्यापटप प्रयोग गरिएको प्रहरीको तथ्यांकले जनाएको छ ।

‘ठ्याक्कै एक व्यक्तिले ६ वटा मोइबल र २ वटा ल्यापटप प्रयोग गरेको भन्ने होइन तर पक्राउ परेका चिनियाँ नागरिक, मोबाइल एवं ल्यापटपको संख्याको अनुपात हेर्दा एक व्यक्ति बराबर ६ मोइबल र २ ल्यापटप प्रयोगमा रहेको देखिन्छ ।’ अनुसन्धानमा सहभागी एक प्रहरी अधिकारीले बेस्टखबर डटकमलाई जानकारी दिए ।

पक्राउ गरिएको विद्यतुीय सामग्रीको नेपाली मूल्य करोडौं रुपियाँ बराबर रहेको प्रहरीको भनाई छ । आज प्रहरीले पक्राउ परेकाहरुको साथबाट बरामद गरिएको पासपोर्ट, मोइबल, ल्यापटप, सिपियु, सिमकार्डलगायतका सामग्रीसहित गरेको पत्रकार सम्मेलनमा कतिपय चिनियाँ नागरिकको पासपोर्ट फेला पार्न नसकिएको जनाएको छ ।

चिनियाँ आर्थिक प्रणालीमा गम्भीर असर पर्ने समूहको बारेमा चिनियाँ सरकारी टोलीले दिएको सूचनाको आधारमा प्रहरीले सर्च अपरेशन गरेको जनाएको छ । प्रहरीले आज गरेको पत्रकार सम्मेलनमा पक्राउ परेकाहरुको घर खानतलासी गर्दा ९८ वटा सीपीयू, ९९ मोनिटर, २२ पेनड्राइभ डाइभ र ३ सय २७ सीमकार्ड बरामद गरेको तथ्यांक सार्वजनिक गरेको छ । पक्राउ परेकाहरुलाई पाँच दिनको म्याद थप गरी थप अनुसन्धान अघि बढाइएको प्रहरीको भनाई छ ।

Comment from facebook