एउटा तस्वीरले जगाएको ‘मानवता’…

Best Khabar Team | २०७६ पुष १८ गते शुक्रबार

– बन्दना सापकोटा / बेष्टखबर डटकम

झण्डै २ सातादेखि काठमाडौं केन्द्रीत आन्दोलन गरिरहेका उखुकिसानहरुले काठमाडौंमा थुप्रै हण्डर खाए । यस क्रममा केही मुटु दुखाउने तस्वीरहरु सार्वजनिक भए । ती तस्वीरहरु मध्येको एक थियो – एकजना किसानले आफ्ले पसिना चुहाएर गरेको मेहनतको मूल्य पाउन सरकारको शहरमा आएर आँखामा आँसु छचल्काउँदै न्यायको ढोका ढक्ढक्याउँदै गरेको ।

त्यो तस्वीर एकाएक सामाजिक सञ्जालमा फैलिन थाल्यो । सामाजिक सञ्जालमा त्यो तस्वीर सार्वजनिक भएपछि एकजना मनकारी जसले आफ्नो क्षमताले भ्याएको सहयोग गर्न तयार देखिए र उनले सार्वजनिक रुपमै त्यसको अपिल गरे । न्यायको भिख माग्दै काठमाडौं आएका किसानको आँखामा आँसुदेखेपछि काठमाडौंमा पर्यटन व्यवसाय गर्दै आएका गोर्खाका राजेन्द्र बजगाईँको मन भक्कानियो ।

अनि विभिन्न च्यानलबाट उखु किसानसँगको सम्पर्कमा पुगेका उनले शुक्रबार दिउँसो काठमाडौंमा पुसे झरीकै बीच ५० जना उखु किसानलाई न्यानो ज्याकेट वितरण गरे । त्यसो त अहिलेसम्म काठमाडौं छिरेका उखु किसानलाई व्यक्तिगत वा सरकारी तबरबाट आर्थिक वा अन्य उल्लेख्य सहयोग गरेको समाचार सार्वजनिक भएको छैन ।

तर बजगाईले शुक्रबार मानव भएर मानवीय धर्म पुरा गरेका छन् । यहाँ प्रसंग ज्याकेट वा बजगाईँको होइन, मानवताको हो । कसैको शरीरमा घाउ देख्दा घाउमा मल्हम पट्टी लगाउन हामीलाई हाम्रा पितापुर्खाले सिकाएका हुन्, त्यहि धर्म बजगाईँले पुरा गरे । अनि एउटा मानवीय संस्कारको श्रीगणेश गरे । यस्ता मानवीय कार्यमा अरु बजगाईँहरु जन्मनुपर्दछ । जसले समाजमा सहयोग र बन्धुत्वको सम्बन्ध बढाउँछ । हामीसँगको छोटो कुराकानीमा बजगाईँले भने –“मैले ठूलो केही गरेको होइन, एउटा मानवीय धर्म मात्रै पुरा गरेको हुँ । राज्यको अगाडि म केही होइन । ”

Comment from facebook