उपत्यकामा १२७ सहित देशभर ५२५ जना कोरोना संक्रमित थपिए, मृतकको संख्या ९५ पुग्यो

Best Khabar Team | २०७७ श्रावण २९ गते बिहिबार

१३ अगस्ट, २०२०
काठमाडौं । पछिल्लो २४ घण्टायता काठमाडौं उपत्यकामा १ सय २७ सहित देशभर थप ५ सय २५ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले आज गरेको नियमित पत्रकार सम्मेलनमा दिइएको जानकारी अनुसार काठमाडौं उपत्यकामा थप १ सय २७ जनामा कोरोना संक्रमण देखिएको छ ।

ती मध्ये १ सय ११ जना काठमाडौं जिल्लाभित्र बस्ने बासिन्दा भएको बताइएको छ । ललितपुरमा ११ जना र भक्तपुरमा थप ५ जनामा पनि कोरोना संक्रमण देखिएको मन्त्रालयको भनाई छ । पछिल्लो २४ घण्टामा देशभर थप ४ जनाको कोरोनाका कारण ज्यान गएको छ । जसमा मोरङ्गका ५७ वर्षका एकजना पुरुष, धनुषाका ८५ वर्षकी महिला, अछामका १८ वर्षका एक युवक र महोत्तरीका ५७ वर्षका एक पुरुष रहेका छन् ।

अहिलेसम्म देशभर कोरोनाका कारण ज्यान गुमाउनेको संख्या ९५ पुगेको छ भने कोरोना संक्रमितको संख्या २४ हजार ९ सय ५७ पुगेको छ । यस्तै देशभरबाट हालसम्म १६ हजार ८ सय २७ जना कोरोना भाइरस मुक्त भएर घर फर्केका छन् । पछिल्ला दिनहरुमा भारतलगायत तेश्रो मुलुकबाट नेपाल आउनेहरुको संख्या बढेसँगै लकडाउन पनि खुल्ला भएका कारण संक्रमितको संख्या बढेको हो ।