डेढ दशकपछि पुनः पृथ्वी जयन्तीमा सार्वजनिक विदा !

Best Khabar Team | २०८० भाद्र १५ गते शुक्रबार

०९ जनवरी, २०२३
काठमाडौं । झण्डै डेढ दशकपछि राष्ट्रनिर्माता पृथ्वी नारायण शाहको जन्मदिनको अवसरमा सार्वजनिक विदा दिन शुरु गरिएको छ । नेपाल सरकार मन्त्री परिषद्को आज अपरान्ह बसेको बैठकले यही पुस २७ गते परेको पृथ्वी जयन्तीको अवसरमा राष्ट्रिय रुपमा विदा (सार्वजनिक विदा) दिने निर्णय गरेको हो । वर्तमान सरकार निर्माणमा सहभागी सत्ता साझेदार राष्ट्रिय प्रजातन्त्र पार्टीको विशेष आग्रहलाई मध्यनजर गर्दै सरकारले पुस २७ गतेको पृथ्वी जयन्तीको अवसरमा सार्वजनिक विदा दिने घोषणा गरेको छ ।

विगतमा नेपाल एकीकरणमा महत्वपूर्ण भूमिका निर्वाह गरेका तत्कालीन ‘बडामहाराजाधिराज’ पृथ्वी नारायण शाहको जन्मजयन्तीको अवसरमा हरेक वर्षको पृथ्वी जयन्ती अर्थात् पुस २७ का दिन सार्वजनिक दिने प्रचलन रहेको थियो । तर नेपालमा राजतन्त्रको अन्त्यसँगै गणतन्त्रको स्थापना भएपछि २०६३ सालपछि पुस २७ को दिन दिइँदै आएको सार्वजनिक विदा हटाइएको थियो । यद्यपि कमल थापा नेतृत्वको तत्कालीन राप्रपाले सदन बाहिर रहँदा पुस २७ लाई सार्वजनिक विदा दिनुपर्नेमा सभा समारोह मार्फत् चर्को बहस गर्ने गरेको थियो ।

तर स्मरणीय के छ भने २०६३ पछि पछि थापा विभिन्न मन्त्रीपरिषद्मा रहँदा कहिल्यै पनि पुस २७ लाई सार्वजनिक विदा दिइएको थिएन । तर यसपटक राप्रपाका अध्यक्ष राजेन्द्र लिङ्गदेनले सरकारलाई समर्थन गर्नुपूर्व नै यो मागलाई जोडतोडका साथ अघि सारेका थिए । फलस्वरुप सरकारले आज बसेको मन्त्रीपरिषद् बैठक मार्फत् पुस २७ लाई सार्वजनिक विदा दिने घोषणा गरेको हो । प्रस्तुत विषयलाई सरकारले न्यूनतम साझा नीति तथा कार्यक्रममै समावेश गरेको छ ।

Comment from facebook