ओली–प्रचण्ड नेतृत्वको नेकपा खारेजसँगै एमाले र माओवादी केन्द्रबीचको एकता संकटमा

Best Khabar Team | २०७८ असार १९ गते शनिबार

०७ मार्च, २०२१
काठमाडौं । ऋषि कट्टेल नेतृत्वको नेपाल कम्युनिष्ट पार्टीलाई सर्वोच्च अदालतले आधिकारिक पार्टी ठहर गरेसँगै वर्तमान प्रधानमन्त्री केपी शर्मा ओली तथा पूर्व प्रधानमन्त्री पुष्पकमल दाहाल प्रचण्ड नेतृत्वको नेपाल कम्युनिष्ट पार्टी (नेकपा) खारेज भएको छ । नेपाल कम्युनिष्ट पार्टीको आधिकारिताका विषयमा परेको रिटमाथि सुनुवाई गर्दै सर्वोच्च अदालतले कट्टेल नेतृत्वको नेपाल कम्युनिष्ट पार्टीनै आधिकारिक भएको निर्णय सुनाएको हो ।

सर्वोच्च अदालतका न्यायाधीशहरु बमकुमार श्रेष्ठ र कुमार रेग्मीको संयुक्त इजालसले आज कट्टेल नेतृत्वको नेकपाको पक्षमा फैसला सुनाएको हो । सर्वोच्च अदालतको यो फैसलासँगै दाहाल र ओली अध्यक्ष रहेको नेकपाको आधिकारिकता समेत समाप्त भएको छ । कट्टेल नेतृत्वको नेपाल कम्युनिष्ट पार्टी निर्वाचन आयोगमा दर्ता भै सकेको भएपनि केपी ओली नेतृत्वको एमाले र दाहाल नेतृत्वको नेकपा माओवादीले एकीकरण गरी पार्टीको नाम नेपाल कम्युनिष्ट पार्टी राख्ने निर्णय गर्दै त्यसको लागि निर्वाचन आयोगमा निवेदन दिएका थिए ।

तर निर्वाचन आयोगमा ऋषि कट्टेल अध्यक्ष रहेको नेपाल कम्युनिस्ट पार्टी दर्ता भै सकेका कारण उनीहरुले नाम नेपाल कम्युनिस्ट पार्टी (नेकपा) राखेर आयोगमा बुझाएका थिए । लगत्तै कट्टेलले आफू नेतृत्वको नेकपा नै आधिकारिक नेपाल कम्युनिष्ट पार्टी भएको दाबीसहित सर्वोच्च अदालतमा रिट दायर गरेका थिए । सोही रिट उपर सर्वोच्च अदालतले आज सुनाएको फैसला अनुसार अब कट्टेल नेतृत्वको नेपाल कम्युनिष्ट पार्टी नै आधिकारिक भएको छ ।

सर्वोच्चको यो निर्णयसँगै नेकपा (एमाले) र माओवादी केन्द्र बीचको एकता पछि बनेको नेपाल कम्युनिष्ट पार्टी (नेकपा) खारेज भएको छ भने एकता पनि स्वतः भंग भएको छ । यदि अब माओवादी र एमालेले न्यायलयको निर्णयलाई मान्ने हो भने नेकपा केन्द्रको नेतृत्व दाहाल र एमालेको नेतृत्व ओलीले नै सम्हाल्नुपर्ने हुन्छ ।