बेलायतबाट नेपाल आउने सबै उडानमा रोक लगाउने सरकारको निर्णय

Best Khabar Team | २०७७ पुष ७ गते मंगलबार

२२ डिसेम्बर, २०२०
काठमाडौं । नेपालले बेलायतबाट नेपालमा हुने सबै हवाई उडानहरुमा रोक लगाउने निर्णय गरेको छ । कोभिड नियन्त्रणसम्बन्धि उच्चस्तरीय निर्देशक समितिको आज बसेको बैठकले भोलि अर्थात् २३ डिसेम्बर मध्यरातबाट लागूहुने गरी अनिश्चितकालका लागि बेलायतबाट आउने सबै उडानहरुमा प्रतिबन्ध लगाउने निर्णय गरेको हो ।

बेलायतका दक्षिणपूर्वी शहरहरुमा पछिल्ला दिनहरुमा कोरोना भाइरसका कडा लक्षणसहितका विरामी देखिएपछि यसअघि युरोपलगायत विभिन्न देशले बेलायतसँगको हवाई उडानमा रोक लगाउने निर्णय गरिसकेको छ । शुरुमा चिनको बुहानमै देखिएको जस्ता कडा प्रकारको लक्षणसहितका सयौं संक्रमित देखिएपछि संक्रमणबाट बच्न भन्दै युरोपका सबैजसो देशले बेलायतबाट हुने उडानमा रोक लगाएका हुन् ।

यस्तै नेपाल सरकारले पनि कोरोनाका गम्भीर प्रकृतिका लक्षणसहितका विरामीहरु भित्रन सक्ने र यसले कोरोना संक्रमण जटिल बन्नसक्ने निष्कर्षसहित उडानमा रोक लगाउने निर्णय गरेको समितिले जनाएको छ । यसका साथै अन्यदेशबाट आउने यात्रु जसले बेलायतको ट्रान्जिट प्रयोग गरेर नेपाल आउँदैछन्, उनीहरुलाई समेत प्रवेशमा रोक लगाउने निर्णय गरेको छ ।

सरकारले पुस १ गतेयता बेलायतबाट वा बेलायत हुँदै नेपाल आएकाहरुलाई अनिवार्यरुपमा क्वारेन्टाइनमा बस्न अनुरोध समेत गरेको छ ।