शैक्षिक संस्था तत्काल नखुल्ने

Best Khabar Team | २०२६ पुष १७ गते बिहिबार

३० अगस्ट, २०२०
काठमाडौं । सरकारले शिक्षण संस्था तथा धेरै शिक्षार्थी भेला भएर सञ्चालन हुने शैक्षिक गतिविधि तत्काल सञ्चालन नगर्ने निर्णय गरेको छ । पछिल्ला दिनमा कोरोना संक्रमितको संख्या बढ्दै गएपछि सरकारले देशव्यापी रुपमा शैक्षिक संस्था, (विद्यालय, क्याम्पस तथा विश्वविद्यालय) हरु कम्तीमा आगामी भदौ मसान्तसम्म सञ्चालन नगर्न नगराउन सम्बन्धित सबैमा अनुरोध गरेको छ ।

नेपाल सरकार मन्त्रीपरिषद्को आज बसेको बैठकले कोरोना संक्रमणको संख्या ह्वात्तै बढेकाले भर्चुअल कक्षाबाहेक विद्यालयको भर्ना, पठनपाठन, क्याम्पसहरुमा हुने शैक्षिक गतिविधिलगायतलाई भदौ मसान्तसम्म सञ्चालन गर्न नदिने निर्णय गरेको हो । शिक्षा मन्त्रालयसमेतको समन्वयमा यो निर्णय गरिएको सरकारले जनाएको छ । सरकारले विशेष गरी विद्यालय, क्याम्पस, ट्युसन तथा कोचिङ्ग सेन्टर, तालिम केन्द्रलगायतलाई आगामी भदौ मसान्तसम्म सञ्चालनका लागि रोक लगाएको हो ।

यस्तै सभा, समारोह, गोष्ठी, तालिम, सेमिनार, विभिन्न खाले धार्मिक गतिविधि, विभिन्न खालका मेला, महोत्सव, भेला, प्रदर्शी, डान्सबार, सिनेमाहल, पौडी पोखरी, पार्टी प्यालेसलगायत भदौ मसान्तसम्मका लागि सञ्चालन नगर्न सबैमा अनुरोध गरेको छ ।

सरकारको यो निर्देशनलाई नमानेर यस्ता गतिवधि गरेमा कानुनी कारबाही गर्ने चेतावनी सरकारले दिएको छ ।