नेपालमा कोरोनाबाट दोश्रो मृत्यु, बाँकेका २५ वर्षका युवकको ज्यान गयो

Best Khabar Team | २०७७ जेठ ४ गते आइतबार

१७ मे, २०२०
काठमाडौं । नेपालमा कोरोना संक्रमणमा परी ज्यान गुमाउनेको संख्या २ पुगेको छ । स्वास्थ्य मन्त्रालयले दिएको जानकारी अनुसार आज बाँकेमा २५ वर्षका एक युवकको कोरोना संक्रमणको आशंकामा क्वारेन्टाइनमै रहेको अवस्थामा मृत्यु भएको हो । ती युवक बैशाख ३० गते भारतबाट नेपाल फर्केर क्वारेन्टाइनमा बसेका थिए । गएरातिदेखि स्वासप्रश्वास सम्बन्धी समस्याबाट ग्रसित बनेपछि अस्पताल लैजाने तयारी भै रहँदा क्वारेन्टाइनमै ज्यान गुमाएका थिए ।

आज बिहान ४ बजेतिर एक्कासी वान्ता गरेका उनको त्यसको केहीबेरमै ज्यान गएको थियो । बाँकेको नरैनापुर घर भएका उनी रोजगारीको लागि भारतको मुम्बई पुगेका थिए । लकडाउनलाई छिचोल्दै उनी बैशाख ३० गते गाउँ फर्केर क्वारेन्टाइनमा बसेका थिए । उनको मृत्यु भएपछि क्वारेन्टाइनमा बसेका अन्यको पनि स्वास्थ्य परीक्षण थालिएको छ ।

यसअघि हिजोमात्रै सिन्धुपाल्चोककी २९ वर्षकी सुत्केरी महिलाको कोरोनाका कारण ज्यान गएको पुष्टि भएको थियो । हालसम्म नेपालमा कारोनाका कारण २ जनाको ज्यान गएको छ भने २ सय ९१ जना संक्रमित भेटिएका छन् । जसमध्ये ३७ जना उपचारपछि घर फर्केका छन् ।

Comment from facebook