कालीकोट दुर्घटना : २ को मृत्यु, ६ वेपत्ता, ३१ को जीवितै उद्दार

Best Khabar Team | २०७७ जेठ २८ गते बुधबार

१० जुन, २०२०
मान्मा । कालीकोटको लालीघाटमा आज भएको टिप्पर दुर्घटनामा दुईजनाको ज्यान गएको छ । सो घटनामा परी ६ जना वेपत्ता भएका छन् भने ३१ जनाको कर्णाली नदीबाट जीवितै उद्दार गरिएको छ । जिल्ला प्रहरी कार्यालयले दिएको जानकारी अनुसार भारतमा रहेका मजदुरहरुलाई सिमा नाकाबाट जिल्लाको रासकोटतर्फ लिएर आउँदै गर्दै ना ८ ख ५१३३ नम्बरको टिप्पर आज बिहान लालीघाटबाट कर्णली नदीमा खसेको थियो ।

कुल ३९ जना सवार सो टिप्पर अनियन्त्रित भै भीरबाट कर्णाली नदीमा खसेको प्रत्यक्षदर्शीले जनाएका छन् । दुर्घटनास्थलबाट उद्दार गरिएकामध्ये ५ जनाको अवस्था गम्भीर रहेको र उनीहरुलाई थप उपचारका लागि जिल्ला अस्पतालमा उपचारका लागि भर्ना गरिएको छ । भारतबाट आएका मजदुरहरुलाई लिएर सो टिप्पर रासकोटका लागि छुटेको थियो । ती मजदुरहरुलाई रासकोटमै रहेको क्वारेन्टाइनमा राख्ने योजना अनुसार उनीहरुलाई लिएर टिप्पर क्वारेन्टाइनतर्फ अघि बढ्ने क्रममा बीच बाटैमा दुर्घटनामा परेको हो ।

दुर्घटनामा ६ जना अहिलेसम्म पनि कर्णाली नदीमै वेपत्ता भएको बताइएको छ । मृतक, घाइते तथा वेपत्ता हुनेहरुको नाम खुल्न सकेको छैन । घटनालगत्तै अहिले स्थानीय वासिन्दा र प्रहरी घटनास्थलमा पुगेर घाइतेको उद्दारमा जुटेका छन् ।