७२ वर्षमा ब्रह्मलीन भए ‘हिम चितुवा’ शेर्पा

Best Khabar Team | २०७७ आश्विन ५ गते सोमबार

२२ सेप्टेम्बर, २०२०
काठमाडौं । हिमाल आरोहणमा किर्तिमान राखेर ‘हिम चितुवा’ को उपाधी पाएका विख्यात आरोही आङरिता शेर्पाको आज निधन भएको हो । ७२ वर्षका आरोही शेर्पाको काठमाडौंको जोरपाटीस्थित आफ्नै छोरीको घरमा निधन भएको उनको परिवारले जानकारी दिएको छ ।

उनले विगतमा १० पटकसम्म अक्सिजन (सिलिण्डरको साहारा) नलिइकनै सगरमाथा आरोहण गरेर विश्व किर्तिमान समेत राखेका उनले अन्तिम पटक सन् १९९६ मा विना अक्सिजन सगरमाथाको आरोहण गरेका थिए । विश्वको सर्वोच्च शिखर सगरमाथा बाहेक नेपालकै अन्य दर्जनौं हिमाल तथा पाकितानको माउन्ट केटुसमेत अक्सिजन विना नै आरोहण गरिसकेका थिए ।

उनले पहिलो पटक सन् १९८३ मा सगरमाथामा पहिलो पटक अक्सिजन विना आरोहण गरेका थिए । स्वर्गीय शेर्पाका तीन छोरा र एक छोरी रहेका छन् । हिमाल आरोहणकै बेला बिरामी भएका उनी पछिल्ला वर्षहरुमा विभिन्न समस्याबाट थलिएर घरमै आराम गरिरहेका थिए । उनको बौद्ध परम्परा अनुसार केहीदिनभित्रै अन्तिम संस्कार गरिएको परिवारले जनाएको छ ।