पर्यटकका लागि थप आकर्षक गन्तव्य बन्दै टिस्टुङ, थपियो प्याराग्लाईडिङ् सेवा

Best Khabar Team | २०७६ माघ ३ गते शुक्रबार

१७ जनवरी, २०२०
हेटौंडा । काठमाडौंसँग सिमाना जोडिएको मकवानपुर जिल्लाको टिस्टुङ्गमा प्याराग्लाइडिङ् सेवा शुरु हुने भएको छ । नेपाल नागरिक उड्डयन प्राधिकरण र यहाँस्थित उत्साहि पर्यटन व्यवसायीहरु सम्मिलित टिस्टुङ प्याराग्लाइडिङ प्रालिको सहकार्यमा पर्यटकीय क्षेत्र टिस्टुङ्गमा छिट्टै नै प्याराग्लाडिङ्ग सेवा शुरु गर्न लागिएको हो । हिउँका पारखीहरु तथा प्राकृतिक सुन्दरताको लागि उत्कृष्ट टिस्टुङ्गमा अब सहासिक पर्यटनको रुपमा परिचित प्याराग्लाइडिङ्ग खेल सेवा थप भएसँगै यहाँ आउने पर्यटकको संख्या ह्वात्तै बढ्ने अनुमान गरिएको छ ।

काठमाडौं र आसपासमा हिमपात हुँदा मकवानपुरको दामान र टिस्टुङ्गमा हिँउ पर्ने भएकोले यहाँ हिउँ परेका बेला हिउँ खेल्नेहरुको भिड् लाग्ने गरेको छ । त्रिभुवन राजपथ अन्र्तगत पर्ने टिस्टुङ्गमा शुरुहुने प्याराग्लाइडिङ्ग अधिकतम ५ हजार फिटको उचाईसम्म हुनेछ । नेपाल भ्रमणवर्ष २०२० को सन्दर्भ तथा स्वदेशी तथा विदेशी पर्यटकलाई मध्यनजर गर्दै आगामी फागुन १५ गते अर्थात् २७ फेब्रुअरीबाट यो सेवा शुरु हुने बताइएको छ ।

काठमाडौंबाट टिस्टुङ्गको देउरालीसम्मको दुरी करिब ५५ किलोमिटर रहेको छ । प्रदेशनम्बर ३ को राजधानी बन्न लागेको मकवानपुरको हेटौंडाबाट ८४ किलोमिटर उत्तर पश्चिममा पर्ने टिस्टुङ्ग काठमाडौंबासीहरुको पनि पर्यटकीय गन्तव्यको रुपमा रहेको छ । यहाँको अर्गानिक खानेकुरा, जीवनशैलीलगायतले स्वदेशी तथा विदेशी पर्यटकको ध्यान खिच्ने गरेको छ ।

Comment from facebook