नेपालका ४२ जिल्लामा भेटिए कोरोना संक्रमित, बाँके सबैभन्दा धेरै प्रभावित (प्रदेश र जिल्लागत तथ्यांकसहित)

Best Khabar Team | २०२६ पुष १७ गते बिहिबार

२३ मे, २०२०
काठमाडौं । नेपालका कुल ४२ जिल्लामा हालसम्म कोरोना संक्रमण देखिएको छ । स्वास्थ्य तथा जनसंख्या मन्त्रालयले आज साँझ जारी गरेको विज्ञप्ति अनुसार देशको सबै प्रदेशमा कोरोना संक्रमण देखिएको छ ।

यद्यपि हालसम्म ४२ जिल्लाका बासिन्दामा मात्रै कोरोना देखिएको भन्दै मन्त्रालयले यसको नियन्त्रणका लागि विशेष सावधानी अपनाउन सबैमा आग्रह गरेको छ । मन्त्रालयले दिएको जानकारी अनुसार नेपालको प्रदेश र जिल्लागतरुपमा कोरोना संक्रमित, उपचारपछि घर फर्केका र कोरानाकै कारण ज्यान गुमाउनेहरुको संख्या यसप्रकार रहेको छ ।

प्रदेश नम्बर १
यो प्रदेशमा पर्ने उदयपुरमा ३३ जना, खोटाङ्गमा १ जना, झापामा ३६ जना, धनकुटामा ७ जना, भोजपुरमा १ जना, सुनसरीमा ३ जना र मोरङ्गमा ५ जनामा हालसम्म कोरोना संक्रमण देखिएको छ तीमध्ये उदयपुरबाट २३ जना, झापाबाट २ जना, भोजपुरबाट १ जना उपचारपछि घर फर्केका छन् ।
प्रदेश नम्बर २
प्रदेश नम्बर २ मा पर्ने धनुषामा हालसम्म ९ जना, पर्सामा ९१ जना, बारामा ११ जना, महोत्तरीमा ३ जना, रौतहटमा २२ जना, सप्तरीमा २ जना, सर्लाहीमा ३३ जना र सिराहमा १ जनामा कोरोना संक्रमण देखिएकोमा हालसम्म धनुषका १, पर्साका ४ र रौतहटका १ जनाले कोरोनलाई पराजित गरी उपचारपछि घर फर्केका छन् । यो प्रदेशमा कोरोनाका कारण हालसम्म कसैको ज्यान गको छैन ।
प्रदेश नम्बर ३ (बाग्मती प्रदेश)
बाग्मती प्रदेश अन्र्तगत काठमाडौंमा अहिलेसम्म ११ जना, काभ्रेपलाञ्चोकमा १ जना, चितवनमा ६ जना, धादिङ्मा ३ जना, भक्तपुरमा ४ जना, मकवानपुरमा ३ जना, रामेछापमा १, ललितपुरमा १, सिन्धुपाल्चोकमा १ र सिन्धुली जिल्लामा १ जनामा कोरोना देखिएको छ । ती मध्ये काठमाडौंका ४, चितवनका २, धादिङ्गका एक र भक्तपुरका दुईजनाले कोरोनालाई जित्दै उपचारपछि घर फर्केर स्वास्थ्यलाभ गरिरहेका छन् । सिन्धुपाल्चोककी एक २९ वर्षकी सुत्केरीको उपचारका क्रममा धुलिखेल अस्पतालमा कोरोनाकै कारण निधन भएको छ ।
प्रदेश नम्बर ४ (गण्डकी प्रदेश)
गण्डकी प्रदेशमा पर्ने नवलपरासी पूर्वमा २ जना, लमजुङ्गमा १ जना, बाग्लुङ्गमा २ जनामा कोरोना देखिएको छ । बाग्लुङ्गमा कोरोना देखिएका २ जनाले कोरोनालाई जितेका छन् । उनीहरुमा एकजना बृद्द महिला र एक युवती हुनुहुन्छ ।
प्रदेश नम्बर ५
यो प्रदेशमा पर्ने कपिलबस्तुमा ७७ जना, नवलपरासीमा ६ जना र बर्दियामा ३ जनामा संक्रमण देखिएको छ । यस्तै बाँकेमा १४२ जनामा, रुपन्देहीमा ३७ जना, दाङ्गमा ५ जना र गुल्मीमा १ जनामा संक्रमण देखिएको छ । बाँकेमा २१ जना उपचारपछि घर फर्केका छन् भने १ जनाको उपचारकै क्रममा ज्यान गएको छ । यस्तै पाँच नम्बर प्रदेशकै गुल्मीमा पनि एक शिक्षकको कोरोनाका कारण ज्यान गएको छ । रुपेन्देहीमा एकजनाले कोरोनालाई जितेर घर फर्केका छन् ।
प्रदेश नम्बर ६ (कर्णाली प्रदेश)
कर्णाली प्रदेशका २ जिल्लामा हालसम्म ४ जनामा कोरोना संक्रमण देखिएको छ । स्वास्थ्यमन्त्रालयका अनुसार कर्णालीको दैलेखमा १ र सुर्खेतमा ३ जनामा कोरोना देखिएको हो ।
प्रदेश नम्बर ७ (सुदुरपश्चिम प्रदेश)
सुदुरपश्चिम प्रदेशका ३ जिल्लामा कोरोना संक्रमित देखिएका छन् । जसमा कैलाली, डडेलधुरा र बैतडी रहेका छन् । डडेलधुरामा हालसम्म १ जनामा, बैतडीमा ५ जना र कैलालीमा ७ जनामा कोरोना संक्रमण देखिएको छ । ती मध्ये कञ्चनपुरका एक र कैलालीका ४ जना निको भएर घर फर्केको मन्त्रालयले आज साँझ अद्याबधिक गरेको तथ्यांकमा उल्लेख छ ।

मन्त्रालयको यो तथ्यांकलाई आधारमान्दा हालसम्म देशभर कुल ४१ जिल्लामा कोरोना संक्रमण फैलिएको छ । ५ सय ८४ जनामा संक्रमण फैलिएको र ती मध्ये ७० जना उपचारपछि घर फर्केका छन् । कोरोनाको संक्रमणमा परी हालसम्म ३ जनाले ज्यान गुमाएको मन्त्रालयको भनाई छ । यो तथ्यांक मन्त्रालयले आज शनिबार साँझ ६ बजे जारी गरेको तथ्यांक हो ।