हेटौंडामा गाँजा तस्कर समात्न २ राउन्ड हवाई फायर

Best Khabar Team | २०७६ पुष १९ गते शनिबार

०४ जनवरी २०२०
हेटौंडा । मकवानपुरमा प्रहरीले गाँजा तस्कर समात्नका लागि गोली चलाउनु परेको छ । जिल्ला प्रहरी कार्यालयका अनुसार विशेष सुराकीको आधारमा गाडीमा गाँजा लिएर आएको सूचना पाएपछि प्रहरीको टोली त्यता अघि बढेको थियो ।

पूर्व पश्चिम लोकमार्ग अन्र्तगत पर्ने चुरियामाईको जंगलमा गाडी चेक जाँच गर्ने क्रममा प्रहरीले गाडी रोक्न खोजेको थियो । तर उनीहरुले भारतीय नम्बर प्लेट डीएल ३ सीए क्यु नम्बरको सो कार नरोकेपछि प्रहरीले दुई राउन्ड हवाई फायर गरेको थियो । त्यसलगत्तै प्रहरीले उनीहरुलाई पिछा गर्ने क्रममा केही अगाडि गाडी र ३२ गाँजा अनि त्यसमा संलग्न ३ जनलाई नियन्त्रणमा लिएको जनाएको छ ।

प्रहरीले गाडी चालक भारतका मोतिहारीका दिलिपकुमार सिंह, कारमा सवार मोतिहारीकै १८ वर्षीय उज्जलकुमार ठाकुर, रौतहट यमुनामाई ४ का २४ वर्षीय विकाश सिंहलाई नियन्त्रणमा लिएको छ । उनीहरुलाई गाडी छाडेर भाग्दै गरेका बेला प्रहरीले पक्रेको हो ।

उनीहरुको साथमा रहेको ३२ किलोग्राम गाँजा पनि प्रहरीले बरामद गरेको छ । प्रक्राउ परेकाहरुलाई प्रदेश नम्बर ३ स्थित प्रहरी मुख्यालयमा बुझाइएको छ । घटनाको थप अनुसन्धान अघि बढाईको प्रहरीको भनाई छ ।

Comment from facebook