भारतमा भएको बस दुर्घटनामा ३९ जनाको शव भेटियो, मृतकका परिवारलाई २ लाख रुपैयाँ राहत : प्रधानमन्त्री मोदी

Best Khabar Team | २०२६ पुष १७ गते बिहिबार

१६ फेब्रुअरी, २०२१
नयाँदिल्ली । भारतको मध्य प्रदेशमा आज बिहान भएको बस दुर्घटनामा परी ज्यान गुमाउनेको संख्या ३९ पुगेको छ । भारतीय सञ्चार माध्यमहरुले दिएको जानकारी अनुसार मध्यप्रदेश अन्र्तगतको सिधी जिल्लामा आज बिहान यात्रुबाहक बस बाणसागर परियोजनाको नहरमा खसेको थियो ।

बस दुर्घटनामा हराईरहेकाहरुको खोजी गर्दै उद्दारकर्मीहरु । तस्वीर साभार : एनडिटिभी इन्डिया ।

बस पानीमा डुबेर भएको दुर्घटनामा परी ३९ जनाको घटनास्थलमै निधन भएको बताइएको छ । मध्यप्रदेशको सिधी जिल्लाबाट सतनाका लागि छुटेको सो बस रामपुर नैकिन भन्ने स्थानमा बसक छेउको पुलबाट बस नहरमा खसेको थियो । सो दुर्घटनामा परी अहिलेसम्म १२ जना यात्रु हराई रहेको बताइएको छ । दुर्घटनामा परेका मध्ये ६ जना नहरको पानीमा पौडेर बाँच्न सफल भएका छन्। सो बसमा ६० भन्दा बढी यात्रु सवार थिए ।

यसैबीच भारतीय प्रधानमन्त्री नरेन्द्र मोदीले दुर्घटनामा ज्यान गुमाउनेहरुप्रति श्रद्दाञ्जली व्यक्त गर्दै मृतकको परिवारलाई २ लाख रुपैयाँका दरले राहत उपलब्ध गराउने घोषणा गरेका छन् । प्रधानमन्त्री मोदीले घाइतेको उपचारका लागि प्रतिव्यक्ति ५० हजारको दरले सहयोग गर्ने बताएका छन् । दुर्घटनास्थलमा अहिले भारतीय सेना, प्रहरी तथा तालिमप्राप्त उद्दारकर्ताहरुको टोलीले दुर्घटनामा हराईरहेकाहरुको खोजी कार्य जारी राखेका छन् ।

दुर्घटनास्थल मध्य प्रदेशको राजधानी भोपालबाट झण्डै ५ सय ६० किलोमिटरको दुरीमा रहेको छ ।