चितवनको बाँदरमूढे काण्डको १४ वर्ष वित्यो, पिडित अझै अन्यायमै

Best Khabar Team | २०७६ जेठ २३ गते बिहिबार

०६ जुन, २०१९
काठमाडौं । तत्कालीन विद्रोही माओवादीले चितवनको बाँदरमुढेमा यात्रुबाहक बसलाई लक्षित गरी बम पड्काउँदा ३८ यात्रुको घटनास्थलमै ज्यान गएको आज १४ वर्ष पुगेको छ । तत्कालीन समयमा नेपाली सेनासँग माओवादीको मुख्य भिडन्त भै रहेका बेला यात्रुबाहक बसमा सेना चढेको जानकारी पाएपछि माओवादीले यात्रुबाहक बसमा विद्युतीय धराप राखेको थियो ।

सो क्रममा बम पड्कँदा ३८ जना सर्वसाधारणको घटनास्थलमै ज्यान गएको थियो । घटनामा आफन्त गुमाएका परिवारका सदस्यहरुले भने अहिलेसम्म आफूहरुले न्याय नपाएको गुनासो गरेका छन् । तत्कालीन घटनाका विषयमा आन्दोलनका सुप्रिमो पुष्पकमल दाहालसँग गत संसदीय चुनावका बेला३ बुँदे सम्झौता गरेको भएपनि अहिलेसम्म आफूहरुसँग गरेको सम्झौता कार्यान्वयन नभएको पीडितको गुनासो छ ।

चितवन क्षेत्र नम्बर ३ मा पर्ने बाँदरमुडे क्षेत्र हाल दाहालकै क्षेत्रको रुपमा रहेको छ । गत संसदीय चुनावमा उहाँले सो क्षेत्रबाट चुनाव जित्नुभएको थियो । २०७४ मंसीरमा भएको सहमतिमा घटनामा ज्यान गुमाएकाको आश्रित परिवारलाई काम गर्न सक्नेलाई रोजगारीको व्यवस्था गर्ने तथा नसक्नेलाई जीवनवृत्ति दिने उल्लेख छ । यस्तै, बालबालिकालाई शिक्षा स्वास्थयको व्यवस्था गर्ने, घाइतेलाई औषधोपचारको व्यवस्था गर्ने तथा घटनामा ज्यान गुमाएकाहरूको सम्झनामा बाँदरमुढे क्षेत्रमा १० बिघा जमिनमा स्मारक बनाउने सहमति दाहालले गर्नुभएको थियो ।

सहमतिमा ऐतिहासिक नमुना संग्रहालय र चिडियाघर निर्माण गर्ने समेत उल्लेख भएपछि सहमतिको २ वर्ष पुग्दा समेत यी कुनै काम अघि बढेको छैन । राज्यको जिम्मेवार निकायमा रहेका, पार्टीका बरिष्ठ नेता तथा पूर्वप्रधानमन्त्री समेत भै सकेका व्यक्तिले गरेको सहमति कार्यान्वयन नहुँदा स्थानीय निरास बनेका छन् ।

चितवनको बाँदरमूढे काण्डको १४ वर्ष वित्यो, पिडित अझै अन्यायमै

Comment from facebook