कोरोना संक्रमणबाट ललितपुरको पाटन अस्पतालमा २ जनाको मृत्यु

Best Khabar Team | २०७७ भाद्र ५ गते शुक्रबार

२१ अगस्ट, २०२०
काठमाडौं । कोरोना भाइरसको संक्रमणमा परी अस्पतालमा उपचारमा रहेका दुईजनाको आज निधन भएको छ । उपत्यकामा पर्ने ललितपुरको पाटन अस्पतालमा उपचारमा रहेका एक महिला र एक पुरुषको उपचारको क्रममा मृत्यु भएको अस्पताल स्रोतले जानकारी दिएको छ । जिल्ला कोभिड १९ संकट व्यवस्थापन केन्द्रले दिएको जानकारी अनुसार दोलखाकी ३० वर्षकी एक महिला र सर्लाहीका ४६ वर्षका एक पुरुषको मृत्यु भएको छ ।

दोलखा जिल्लाकी ३० वर्षकी ती महिला उपचारका लागि गएको भदौ २ गते अस्पतालमा भर्ना भएकी थिइन् । उपचारकै क्रममा उनको आज निधन भएको अस्पतालको भनाई छ । यस्तै सर्लाही जिल्लाको मलंगवा घर भएका ४६ वर्षका एक पुरुषको पनि उपचारकै क्रममा ज्यान गएको हो । उनी गत साउन ३१ गते उपचारका लागि पाटन अस्पतालमा भर्ना भएका थिए ।

अस्पतालमा उपचारमा रहेका विरामीको मृत्यु भएपछि अस्पताल प्रशासनले अहिले विरामीलाई उपचारमा राखिएको वार्ड र आसपासका क्षेत्रलाई सिल गरेर भाइरस र अन्य जोखिम नियन्त्रणका लागि आवश्यक सावधानी र सरसफाईका उपाय अपनाईरहेको छ ।

Comment from facebook