भारतमा शनिबार हालसम्मकै सबैभन्दा धेरै संक्रमित भेटिए, मृतको संख्या २८ सय नाघ्यो

Best Khabar Team | २०७७ जेठ ३ गते शनिबार

१६ मे, २०२०
नयाँदिल्ली । भारतमा शनिबार एकैदिन ४ हजार ८ सय ६४ जना नयाँ कोरोना (कोभिड १९) का संक्रमित भेटिएका छन् । यो हालसम्म भारतमा एकैदिन भेटिएका सबैभन्दा धेरै कोरोना संक्रमितको संख्या हो । यसअघि मे १० तारिखका दिन भारतमा ४ हजार ३ सय ५३ जनामा कोरोना देखिएको थियो । यस्तै कोरोनाकै कारण भारतमा आज एक सय १८ जनाले ज्यान गुमाएका छन् । भारतमा कोरोनाका कारण संक्रमित हुनेको संख्या शनिबार राती १० बजेसम्म ९० हजार ६ सय ४८ पुगेको छ भने हालसम्म २८ सय ७१ जनाको कोरोनाकै कारण ज्यान गएको छ ।

३२ हजार २ सय २४ जनाको उपचार सफल भएको छ । सिँगो देशलाई लकडाउन गरिएको भएपनि कोरोना संक्रमितको संख्या बढ्दै गएका कारण यसले भयाबह रुप लिनसक्ने आशंका विज्ञहरुले गरेका छन् । दक्षिण एसियाली मुलुकमा भारत अहिले सबैभन्दा धेरै प्रभावित मुलुक बनेको छ । यस्तै विश्वमा सबैभन्दा धेरै कोरोना संक्रमितको सूचीमा भारत ११ नम्बरमा परेको छ ।

भारतको महाराष्ट्र, नयाँदिल्ली, मध्यप्रदेशलगायतका स्थानमा कोरोना संक्रमण तीव्ररुपमा फैलिइरहेको छ । भारतमा कोरोना फैलँदा छिमेकी मुलुक नेपालको तराईका जिल्लामहरुमा पनि यसको प्रभाव देखिन थालेको छ ।