४ महिनादेखि बन्द देशभरको सार्वजनिक यातयात आगामी बिहीबारबाट सञ्चालन गर्ने व्यवसायीको निर्णय

Best Khabar Team | २०२६ पुष १७ गते बिहिबार

२१ जुलाई, २०२०
काठमाडौं । अन्ततः लामो समयको छलफलपछि यातयात व्यवासयीहरु देशव्यापी रुपमा सार्वजनिक यातयात सञ्चालन गर्न सहमत देखिएका छन् । यातयात व्यवसाय सञ्चालन गर्ने विभिन्न यातयात क्षेत्रमा सक्रिय विभिन्न व्यवसायीहरु सम्बद्ध संघ संगठनको आज बसेको संयुक्त बैठकले आगामी साउन ८ गते अर्थात् बिहीबार देखि देशभर सरकारले तोकेको मापदण्ड पुरा गरी यातयात सञ्चालन गर्ने निर्णय गरेको हो ।

यसअघि करिब एक साताअघि सरकारले यातयात व्यवसायीलाई तत्काल जिल्ला भित्र यातयात सञ्चालनका लागि निर्देशन दिएको भएपनि व्यवसायीहरु विभिन्न माग राख्दै तत्काल यातयात सञ्चालन गर्न नसकिने अडानमा थिए । तर सरकारले व्यवसायीको समस्या समाधानका लागि छुट्टै कार्यदल गठन गरी छलफल गर्ने आश्वासन दिएपछि व्यवसायीहरु सार्वजनिक यातयात सञ्चालनका लागि राजी भएका हुन् ।

यसअघि सरकारको निर्णय लगत्तै काठमाडौं उपत्यकालगायत देशका केही जिल्लामा साझा, मयुरलगायतका केही सार्वजनिक गाडीहरुहरुले सेवा निरन्तर गरेका थिए । तर नेपाल राष्ट्रिय यातयात व्यवसायी महासंघलगायतका केही व्यवसायीहरुले लकडाउनका कारण सार्वजनिक गाडी चलाउन नपाउँदा सवारी साधनको मासिक किस्ता र व्याज तिर्न नसकेको भन्दै तत्काल यातयात सञ्चालन गर्न नसकिने बताउँदै आएका थिए ।

उनीहरुले राहतका लागि सरकारसँग विभिन्न माग राखेका थिए । तर सरकारले व्यवसाीको मागलाई सम्बोधनका लागि पहल गर्ने भन्दै सेवा सूचारु गराउन पुनः आग्रह गरेपछि आगामी बिहीबारदेखि यातयात सेवा सञ्चालन गर्न व्यवसायी सहमत देखिएका हुन् । आगामी साउन ८ गतेपछिको अवस्थाका बारेमा सरकारले केही जानकारी नगराएको भन्दै व्यवासायीहरुले अहिले सम्बन्धित जिल्ला भित्र मात्रै र काठमाडौंको हकमा भने तिन जिल्ला भित्र मात्रै गाडी सञ्चालन गर्ने निर्णय गरेका हुन् ।