५ जना स्वास्थ्यकर्मीमा कोरोना देखिएपछि पर्वत अस्पतालले बन्द ग-यो आकस्मिक बाहेकका सबै सेवा

Best Khabar Team | २०७७ असार ५ गते शुक्रबार

१९ जुन, २०२०
फलेबास, पर्वत । अस्पतालमा कार्यरत पाँचजना स्वास्थ्यकर्मीमा कोरोना संक्रमण पुष्टि भएसँगै जिल्ला अस्पताल पर्वतलेको आकस्मिकबाहेकका सबै सेवा अनिश्चितकालका लागि बन्द गरेको छ । अस्पताल स्रोतले दिएको जानकारी अनुसार कोरोना संक्रमितको उपचार तथा स्वाब संकलनमा खटिएका पर्वत जिल्ला अस्पतालका २जना चिकित्सकसहित अन्य तीन कर्मचारीमा आज बिहान मात्रै कोरोना संक्रमण पुष्टि भएको थियो ।

काठमाडौंको केन्द्रीय प्रयोगशालामा गरिएको स्वाब परीक्षणमा उनीहरुमा कोरोना संक्रमण पुष्टि भएपछि अस्पतालले अस्पतालको आकस्मिक उपचार विभागबाहेक अन्य कक्ष बन्द गरेको छ । अहिले अस्पताललाई नै सिल गरेर सरसफाई गर्ने तयारी भै रहेको अस्पताले जनाएको छ । पर्वतको कुस्मामा रहेका जिल्ला अस्पताल पर्वतमा कार्यरत दुई चिकित्सकसहित एकजना ल्याब असिस्टेन्ट, एक स्टाफ नर्स तथा एकजना कार्यालय सहयोगीमा कोरोना पुष्टि भएको थियो ।

अस्पतालले विज्ञप्ति नै निकालेर आकस्मिक बाहेकका अन्य सेवा बन्द भएको जानकारी गराएको छ । पर्वतमा पछिल्लो समयमा भारतबाट आएकाहरुलाई कुस्मास्थित जिल्ला सदरमुकाममा बनाइएको क्वारेन्टाइनमा राखिएको छ । ती मध्ये हालसम्म करिब ३० जनामा कोरोना संक्रमण पुष्टि भएको छ ।