कोरोना संक्रमित बढ्न थालेपछि बेल्जियमको एन्तोर्पिनमा दैनिक साढे ६ घण्टा कर्फ्युको घोषणा

Best Khabar Team | २०७७ श्रावण १५ गते बिहिबार

३० जुलाई, २०२०
लिंकरोभर, बेल्जियम । युरोपेली युनियनको हेडक्वाटर रहेको र युरोपको सम्पन्न मध्यको एक देश बेल्जियमले लकडाउनबाट समेत कोरोना संक्रमण नियन्त्रणमा आउन नसकेपछि निश्चित भागमा कफ्र्यु लगाउने घोषणा गरेको छ ।

बेल्जियमको ऐतिहासिक शहर एन्तोर्पिन अन्तर्गतको ग्रुनप्लाष्ट क्षेत्र । **तस्वीर : प्रतीक लामिछाने । बेष्टखबर डटकम ।**

राजधानी ब्रसेल्सपछिको दोश्रो ठूलो पर्यटकीय शहरको रुपमा परिचित एन्तोर्पिन शहरमा आज रातिबाट लागूहुने गरी कफ्र्यु आदेश जारी गरिएको यहाँबाट प्रकाशित हुने ‘दि ब्रसेल्स् टाइम्सले आफ्नो अनलाईन संस्करणमा उल्लेख गरेको छ । पछिल्ला दिनहरुमा एन्तोर्पिन शहरमा कोरोना संक्रमितको संख्या ह्वात्तै बढ्न थालेपछि आज राति साढे ११ बजेदेखि लागू हुने गरी अर्को सूचना जारी नहुञ्जेलका लागि रातिको समयमा कफ्र्यु लगाउने निर्णय भएको हो । राति साढे ११ बजेदेखि लागू हुने कफ्र्यु बिहान ६ बजेसम्म जारी रहने सरकारी निर्णयहरुमा उल्लेख गरिएको छ ।

पछिल्लो २४ घण्टामा ४ सय भन्दा बढी संक्रमित भेटिएको बेल्जियममा विशेष गरी रात्रिकालीन गतिविधिका कारण कोरोनाको संक्रमण फैलिएको निष्कर्ष सरकारले निकालेको छ । आगामी अगस्ट १ देखि लकडाउनलाई पूर्णरुपमा खारेज गरी जनजीवन सामान्य बनाउने तयारीमा यहाँको सरकार जुटेको भएपनि संक्रमितको संख्या पछिल्लो सातायता बढेपछि सरकारले बाध्य भएर रातिको समयमा कफर्यु लगाउने घोषणा गरेको हो । यो सँगै लकडाउनका केही प्रावधानहरु जारी रहने सरकारले स्पष्ट पारेको छ ।

बेल्लियमको ऐतिहासिक शहर एन्तोर्पिनमा रहेको पुरातात्विक महत्व बोकेको चर्च । **तस्वीर : प्रतीक लामिछाने । बेष्टखबर डटकम ।**

यसअघि सरकारले १२ वर्षभन्दा माथिका मानिसलाई अनिवार्य रुपमा माक्स लगाउने व्यवस्था गरिसकेको छ । सरकारको यो निर्णयसँगै अब साढे ११ बजेपछि एन्तोर्पिन शहरमा कुनैपनि होटल, रेस्टुरेन्ट तथा अन्य रात्रिकालीन गतिविधि हुने स्थानहरु अनिवार्य रुपमा बन्द गर्नुपर्नेछ । कोरोना संक्रमितको संख्या बढ्दै गएपछि सरकारले यसलाई रोक्नका लागि नियमहरु निक्कै कडा बनाएको छ । कोरोनाका कारण बेल्जियममा हालसम्म १० हजार भन्दा धेरैको ज्यान गै सकेको छ भने ६६ हजारभन्दा बढी संक्रमित बनेका छन् । एन्तोर्पिन शहर बेल्जियममा सबैभन्दा धेरै नेपालीहरु बस्ने शहरको रुपमा परिचित छ ।

एन्तोर्पिन शहर बेल्जियमको एतिहासिक शहरको रुपमा परिचित रहेको छ । यहाँ ऐतिहासिक चर्चदेखि विभिन्न खाले पुराना संरचना र संग्रहालयलगायत हेर्नका लागि विश्वभरबाट लाखौं पर्यटक आउने गर्दछन् । यस्तै यहाँको रात्रिकालीन गतिविधिपनि पर्यटकको लागि प्रमुख आकर्षणको रुपमा रहेको छ