निको भएर घर फर्केका काठमाडौंका ५२ वर्षका पुरुषमा पुनः कोरोना संक्रमण

Best Khabar Team | २०७७ बैशाख २३ गते मंगलबार

०५ मे, २०२०
काठमाडौं । ललितपुरको पाटन अस्पतालमा कोरोनाको उपचार गरी निको भएर घर फर्केका काठमाडौंका एक पुरुषमा फेरि कोरोना संक्रमण देखिएको छ । अस्पताल स्रोतका अनुसार गत चैत्र ५ गते बेलायतबाट आफ्नी आमासँगै काठमाडौं आएका ती पुरुषमा कोरोना संक्रमण देखिएपछि पाटन अस्पतालमा राखेर उपचार गरिएको थियो । उनले आफूमा कोरोना संक्रमण देखिएपछि १० दिनसम्म अस्पताल बसेर उपचार गराएका थिए ।

पछि उनको स्वाब परीक्षणका क्रममा नेगेटिभ रिपोर्ट आएपछि चिकित्सकले उनलाई अस्पतालबाट डिस्चार्ज गरिदिएका थियो । उनी गएको बैशाख ११ गते अस्पतालबाट डिस्चार्ज भएपछि नियमित रुपमा घरमै बस्दै आएका थिए । तर चिकित्सकहरुले एकसातापछि फेरि चेकजाँचका लागि आउन सुझाव दिएसँगै उनी हिजो अस्पताल पुगेका थिए । उनको पुनः स्वाब परीक्षणका क्रममा कोरोना पोजेटिभ देखिएको अस्पताल स्रोतको भनाई छ ।

स्वाब परीक्षणका क्रममा फेरि कोरोना देखिएपछि उनलाई पाटन अस्पतालकै आइसोलेसन वार्डमा राखेर पुनः उपचार थालिएको छ । उनीसँगै निको भएर उनको घरमा गएकी आमाको भने रिपोर्ट आइनसकेको बताइएको छ । चैत्र ५ गते ५२ वर्षका ती पुरुष र ८१ वर्षकी उनकी आमा बेलायतबाट काठमाडौं आएका थिए । चेकजाँचका क्रममा गत बैशाख १ गते उनीहरुमा कोरोना संक्रमण पुष्टि भएको थियो ।

Comment from facebook