कोरोनाको क्षति इटली भन्दा अमेरिकामा धेरै : मृतकको संख्या २० हजार नाघ्यो, एकैदिन २ हजार बढीको ज्यान गयो

Best Khabar Team | २०७६ चैत्र २९ गते शनिबार

११ अप्रिल, २०२०
न्यूर्योक । विश्वव्यापी रुपमा महामारीको रुपमा फैलिएको कोरोना भाइरसको संक्रमणबाट बढी प्रभावित मुलुकको रुपमा रहेको युरोपेली मुलुक इटलीलाई अमेरिकाले जितेको छ । अर्थात् कोरोनाको प्रकोपबाट अहिलेसम्म सबैभन्दा धेरै नागरिकको मृत्यु अमेरिकामा हुन पुगेको छ । यो समाचार तयार पार्दासम्म अमेरिकामा कोरोनाका कारण २० हजार १ सय ३५ जनाको मृत्यु भै सकेको छ भने ५ लाख १६ हजार ६ सय ७५ जना प्रभावित बनेका छन् ।

तर यही समयमा इटलीमा १९ हजार ४ सय ६८ जनाको मृत्यु भएको छ । अमेरिकामा आजमात्रै यो समाचार तयार गर्दासम्म १ हजार ३ सय ८८ जनाको ज्यान गै सकेको छ । यही अवधिमा इटलीमा ६ सय १९ जनाको ज्यान गएको छ । अमेरिकामा हिजो विश्वमा कोरोनाबाट एकैदिन सबैभन्दा धेरै मानिसको मृत्यु भएको थियो । हिजो अमेरिकामा कोरोनाका कारण २ हजार ३५ जनाले ज्यान गुमाएका थिए । अमेरिकाको न्यूर्योक कोरोनाको प्रकोपबाट सबैभन्दा बढी प्रभावित बनेको छ । न्यूर्योकमा कोरोनाका कारण हालसम्म ८ हजार ६ सय २७ जनाको ज्यान गएको छ ।

न्यूर्योकपछि न्यूजर्सी सबैभन्दा बढी प्रभावित बनेको छ । न्यूजर्सीमा अहिलेसम्म २ हजार १ सय ८३ जना, मिचिगनमा १ हजार २ सय ८१, क्यालिफोर्नियामा ५ सय ९८, लुसियानामा ८ सय ६ जना, टेक्सासमा २ सय ५४ जनाको ज्यान गै सकेको छ । कोरोनाका कारण अमेरिकामा अधिकांश राज्यहरु प्रभावित बनेको छ ।

कोरोना नियन्त्रणका लागि सरकारले आम नागरिकहरुलाई सचेत बन्न आग्रह गरेको छ । अमेरिकामा पछिल्लो एक सातायता दैनिक १ देखि २ हजारको हाराहारीमा मानिसहरुको ज्यान गै रहेको छ ।