कोरोना कहर : ललितपुर जावालाखेलको सदर चिडियाखानामा प्रवेश निषेध

Best Khabar Team | २०७६ चैत्र ६ गते बिहिबार

१९ मार्च, २०२०
ललितपुर । नेपालको सबैभन्दा पुरानो र ठूलो चिडियाखानाको रुपमा रहेको सदर चिडियाखाना (जु) पनि आम नागरिकका लागि अनिश्चितकालका लागि बन्द भएको छ । विभिन्न घरपालुवा तथा जंगली बन्यजन्तु तथा पशुपंक्षीलाई पालेर राखिएको चिडियाखानामा त्यहाँका कर्मचारी बाहेक अन्यलाई प्रवेश भोलिबाट अनिश्चितकालका लागि बन्द गर्न लागिएको हो ।

बढ्दो कोरोनाको संक्रमणबाट बचाउनका लागि पूर्व तयारी स्वरुप चिडियाखाना बन्द गर्न लागिएको बताइएको छ । चिडियाखाना कहिलेसम्मका लागि बन्द हुनेभन्ने बारेमा केही नबताइएपनि कम्तीमा बैशाख १५ सम्मका लागि बन्द हुने चिडियाखाना सम्बद्ध कर्मचारीहरु बताउँछन् । हाल चिडियाखानाका रहेका पशुपंक्षी हेर्नका लागि दैनिक सयौंको संख्यामा सर्वसाधारणहरु आउने गर्दछन् ।

अहिले विद्यालय तथा क्याम्पस बन्द भएपछि यो संख्या दोब्बर हुने गरेको थियो । मानिसहरुको चाप बढ्दा यसले कोरोनाको जोखिम समेत बढाउने भन्दै तत्कालका लागि चिडियाखाना बन्द गरिएको सदर चिडियाखानाले जनाएको छ ।

कोरोनाका कारण चीनमा कुकुरसमेत मरेको समाचार सार्वजनिक भै रहेका बेला मानिसबाट बन्यजन्तु तथा बन्यजन्तुबाट मानिसमा संक्रमण फैलनसक्ने खतरा बढेकाले पनि यो निर्णय लिइएको बुझिएको छ ।