अष्ट्रेलियाको सिड्नीमा नदीमा डुबेर धादिङ्गका २ युवकको मृत्यु, १ गम्भीर घाइते

Best Khabar Team | २०७६ पुष १९ गते शनिबार

०४ जनवरी, २०२०

सिड्नी । अष्ट्रेलियाको सिड्नीमा नदीमा डुबेर २ नेपाली विद्यार्थीको मृत्यु भएको छ । सो घटनामा अर्का एक नेपाली विद्यार्थी सख्त घाइते भएको बताइएको छ । शुक्रबार स्थानीय समय अनुसार साँझको साढे ७ बजेतिर बेरोबरा नेशनल पार्क नजिकै रहेको सो नदीमा पौडी खेल्न गएका उनीहरुको नदीमा डुबेर मृत्यु भएको अष्ट्रेलियाको नाईन न्यूजले जनाएको छ । मृत्यु हुनेमा २६ वर्षका बिसाल सेढाई र २३ वर्षका रोशन छत्कुली भएको बताइएको छ । छत्कुली र सेढाई दुबैको नेपालको स्थायी ठेगाना धादिङ्ग जिल्ला भएको बताइएको छ । पछिल्ला केही दिनयता अष्ट्रेलियामा तापक्रम ह्वात्तै बढेपछि सेढाई र छत्कुलीसहित ५/६ जना विद्यार्थीहरुको समूह गर्मी छल्न भन्दै सो क्षेत्रमा पुगेका थिए ।

उनीहरु नदीमा छिरेको केहीसमयपछि नै उनीहरुसँगै गएका साथीहरुले स्थानीय आपतकालीन सेवाका कर्मचारीलाई फोन गरेर घटनाको जानकाी गराएका थिए । लगत्तै गोताखोरसहितको उद्धार टोली घटनास्थल पुगेको थियो । उनीहरु घटनास्थल पुग्दा सेढाई र छत्कुली नदीको सतहमा रहेको गिलो माटोमा डुबेको अवस्थामा भेटिएको बताइएको छ ।

घटनामा अर्का एक नेपाली प्रदिप पाण्डे गम्भीर घाइते भएका छन् । बेहोस अवस्थामा पानीबाट निकालेर पाण्डेलाई हाल उपचारको लागि सिड्नीको वेष्टमेड अस्पतालमा भर्ना गरिएको छ । नाईन न्यूजका अनुसार शुक्रबारे सप्ताहन्तमा सो क्षेत्रमा क्याम्पिङ्गसहित माछा मार्नका लागि भन्दै उनीहरुले निकुञ्ज क्षेत्रको टिकट लिएका थिए ।

साप्ताहिक छुट्टी मनाउनका लागि ठूलो संख्यामा मानिसहरु क्याम्पमा बस्ने गरी सो क्षेत्रमा जाने गर्दछन् । घटनाको विषयमा अष्ट्रेलियास्थित उनीहरुको साथिभाई तथा आफन्तमार्फत् नेपालस्थित परिवारलाई जानकारी गराई सकिएको बताइएको छ ।