जर्मनी गोलीकाण्ड : मृतकको संख्या ९ पुग्यो, संदिग्ध आक्रमणकारी र उनकी आमा कोठाभित्रै मृत भेटिए

Best Khabar Team | २०७६ फाल्गुन ८ गते बिहिबार

२० फेब्रुअरी, २०२०
बर्लिन । युरोपेली मुलुक जर्मनीका दुई छुट्टाछुट्टै शहरमा गएराति भएको गोलीकाण्डमा ज्यान गुमाउनेका संख्या ९ पुगेको छ । यद्यपि केही सञ्चारमाध्यमले भने घटनामा संलग्न आक्रमणकारी र उनकी आमासहित घटनामा ११ जनाले ज्यान गुमाएको उल्लेख गरेका छन् । जर्मनीको हानाउ सहरमा एक ४३ वर्षका आक्रमणकारीले स्थानीय एक क्लवमा गएराति ११ बजेतिर अन्धाधुन्द गोली चलाएका थिए ।

पहिलो मध्य हानाउस्थित एउटा बारमा गोलीकाण्ड भएको केही समयपछि नै दोस्रो घटना हनाउकै केसेल्सटाटस्थित अर्को बारमा भएको थियो । पहिलो घटना स्थानीय एक शीशाबारमा भएको थियो जहाँ ३ जनाको घटनास्थलमै ज्यान गएको थियो भने अर्को आक्रमणस्थलमा ५ जनाको ज्यान गएको थियो ।

घटनामा घाइते थप एकजनाको पनि ज्यान गएको बताइएको छ । घटनामा संलग्न संदिग्ध आक्रमणकारी र उनकी आमालाई भने उनको घरमा मृत अवस्थामा फेला पारिएको अन्र्तराष्ट्रिय सञ्चारमाध्यम अलजजिराले जनाएको छ ।

घटनालगत्तै प्रहरीले सो क्षेत्रमा व्यापक सुरक्षा सर्तकता बढाएर आक्रमणकारीको खोजीकार्य तीब्र बनाएको थियो । घटना किन गर्राइको भन्ने विषयमा अहिलेसम्म केही खुल्न सकेको छैन ।